Farg‘ona viloyatida o‘tkazilgan sayyor sudlarda aliment pullarini o‘z vaqtida to‘lamagan 64 nafar qarzdorga 15 sutka ma’muriy qamoq jazosi tayinlangan, deb xabar bermoqda “Daryo” muxbiri.
Qayd etilishicha, viloyat prokuraturasi tomonidan Majburiy ijro byurosi bilan hamkorlikda joylarda fuqarolarning o‘z farzandi uchun aliment pullarini to‘lash bo‘yicha mas’uliyatini oshirish va bu borada jamoatchilik ta’sir choralarini kuchaytirishga qaratilgan tadbirlar olib borilmoqda.
Viloyatning barcha tuman va shaharlarida aliment to‘lashdan qasddan bo‘yin tovlab kelayotgan qarzdorlarga nisbatan to‘plangan hujjatlarni ma’muriy sudlarda ko‘rib chiqish bo‘yicha sayyor sud majlislari tashkil qilingan.
Sayyor sudlarda jami 64 nafar qarzdorga nisbatan Ma’muriy javobgarlik to‘g‘risidagi kodeksning 47-4-moddasi bilan 15 sutka ma’muriy qamoq jazosi tayinlangan, 23 nafar qarzdordan 242,1 million so‘m aliment pullari undirilgan hamda 28 ta oila yarashtirilishiga erishilgan.
Shuningdek, yo‘l-patrul xizmati inspektorlari bilan ham hamkorlikda tezkor reydlar tashkil etilib, ushbu tadbirlar davomida qoidabuzar haydovchilardan 1 milliard 228 million so‘mlik ma’muriy jarimalar undirilgan.
Izoh (0)