Britaniyaning Staffordshir grafligida yashovchi Jozef Flavill o‘n bir oy komada bo‘ldi. Shu vaqt ichida u koronavirus bilan ikki marta kasallangan. Ayni paytda 19 yoshli bemor sog‘aymoqda, deya xabar berdi Daily Mail.
Mashina urib yuborgani uchun Jozef 2020-yilning 1-martida kasalxonaga yotqizilgan. Uch hafta o‘tgach, Buyuk Britaniyada birinchi karantin joriy etildi. O‘n bir oy davomida Jozef komada bo‘ldi va shu vaqt ichida u ikki marta COVID-19’ga chalindi. Shifokorlar yigitchani davolashga muvaffaq bo‘ldi.
Flavill yaqinda komadan chiqdi. Karantin cheklovlari tufayli uning oilasiga kasalxonaga tashrif buyurish taqiqlanadi. Jozef oilasi bilan videoaloqa orqali muloqot qiladi. Yaqinlari hozircha unga koronavirus infeksiyasi haqida aytmaslikka qaror qildi.
Avvalroq Britaniyada 100 yoshli faxriy koronavirusdan vafot etgandi. U koronavirusga qarshi kurashda shifokorlarga yordam berish maqsadida xayriya jamg‘armasi tashkil qilgan va 32 million funt sterlingdan ko‘proq mablag‘ yig‘gan.
Eslatib o‘tamiz, Buyuk Britaniyada koronavirus oqibatida vafot etganlar soni 100 mingdan oshdi. Yevropa davlatlaridan hech birida hali bunday ko‘rsatkich qayd etilmagandi. Britaniya hukumati koronavirusga chalingan fuqarolar uyda qolishi uchun pul to‘lashni taklif qilmoqchiligini ma’lum qilgan.
Izoh (0)