Yevropa Ittifoqi kengashi pandemiya yuzasidan Shengen hududiga kirish cheklovlari bo‘yicha yangi tavsiyalarni ma’qulladi. Yangi cheklovlar 2-fevral kuni yozma tartibda qabul qilindi, deb yozmoqda “Korrespondent.net”.
Xususan, tavsiyalar YeIning uchinchi mamlakatlar bilan chegaralarini har qanday tashrif, shu jumladan, sayyohlik uchun ochishiga oid yangi shartlarni nazarda tutadi. Buning uchun mamlakat quyidagi mezonlarga javob berishi kerak:
- so‘nggi 14 kun ichida infeksiya yuqtirish holatlari soni har 100 ming aholiga 25 tadan oshmasligi kerak;
- so‘nggi ikki hafta ichida yangi yuqtirishlar soni kamayishi yoki oldingi 14 kunlik davrga nisbatan barqaror turishi kerak;
- mamlakat yetti kun davomida har 100 ming aholida 300 dan ortiq test o‘tkazishi kerak;
- so‘nggi yetti kun ichida COVID-19 testining ijobiy natijalari soni 4 foizdan oshmasligi kerak.
Mazkur mezonlarga asoslanib, YeI kengashi tomonidan fuqarolari uchun Shengen hududi chegaralari ochiq bo‘lgan davlatlar ro‘yxati yangilanadi. Ro‘yxat oxirgi marta 2021-yilning 28-yanvarida qayta ko‘rib chiqilgan. Unda faqat yettita mamlakat qolgandi: Avstraliya, Yangi Zelandiya, Ruanda, Singapur, Janubiy Koreya, Tailand va Xitoy.
Yevropa Ittifoqiga uyushtiriladigan zaruriy tashrif uchun qo‘shimcha cheklovlar:
YeI hududiga zaruriy tashrif uchun ruxsat berish holati amalda qoladi. Aniqroq aytganda, YeI mamlakatlarining fuqaro va rezidentlari, shuningdek, transport xodimlari yoki diplomatlarning Shengen hududiga kirishi uchun ruxsat beriladi.
Ammo endilikda buning uchun Shengenga kirishdan 72 soat oldin amalga oshirilgan PZR testining salbiy natijasi to‘g‘risida hujjat talab qilinadi. Ushbu qoida nafaqat transport xodimlariga tegishli, bundan tashqari, mamlakatlar o‘z xohishiga ko‘ra, tashrif buyuruvchilarga qo‘shimcha cheklovlarni — karantin, o‘z-o‘zini izolyatsiya qilish yoki koronavirus uchun qo‘shimcha test choralarini kiritadi.
Tavsiyalar, shuningdek, zaruriy tashrif huquqiga ega kishilar toifasini qisqartirish imkoniyatini ham nazarda tutadi. Bu koronavirusning yangi turlari tarqalishi oqibatida epidemiologik vaziyat tobora yomonlashayotgan uchinchi mamlakatlarga nisbatan qo‘llaniladi.
Chegaradan o‘tish masalalari bo‘yicha YeIning har bir davlati alohida vakolatga egaligi uchun yuqoridagi qoidalar tavsiya shaklida qabul qilingan. Ularning ijrosi mamlakatlar milliy hukumatining zimmasida bo‘ladi. Biroq mazkur tavsiyalarni YeI davlatlari birgalikda qabul qilgani sababli ularning amalga oshirilishi kutilmoqda.
Ushbu ko‘rsatmalar Irlandiyadan tashqari YeIning barcha mamlakatlariga, shuningdek, Shveysariya, Norvegiya, Islandiya va Lixtenshteynga tegishli. Daniya ularga rioya qilish yoki qilmaslik to‘g‘risida o‘zi qaror qabul qilish huquqiga ega.
Mavzuga doir:
Izoh (0)