2021-yilda O‘zbekiston yalpi ichki mahsuloti 5,1 foizga o‘sadi. Bu haqda Fitch Solutions reyting agentligining prognoziga tayanib, Spot xabar berdi.
“Biz o‘z prognozlarimizni mamlakatning COVID-19 tufayli yuzaga kelgan inqiroz ta’siridan joriy yilda chiqib ketishi sabab oshirdik. 2020-yilda mahalliy iqtisodiyot anchayin zarbalarni boshidan kechirganiga qaramay, pandemiya davrida barqarorligini namoyon etdi va tanazzuldan narida turgan dunyodagi kam sonli davlatlar qatoridan joy oldi”, — deya tushuntiradi tahlilchilar.
Shuningdek, ma’lum qilinishicha, bu o‘z navbatida yaqin choraklarda iqtisodiy o‘sish poydevorini yaratish imkonini beradi:
Agentlik kelgusi choraklarda ichki va tashqi talabning sezilarli darajada tiklanishini kutmoqda, chunki cheklash choralari mamlakat ichida va chetda asta-sekin yengillashmoqda.
“Asosiy kapitalga yo‘naltiriladigan sarmoyalar miqdori 14 foizga oshishini kutyapmiz. Chunki korxonalar ishlab chiqarishni kengaytirib boryapti, hukumat esa yangilanish va modernizatsiya bo‘yicha belgilab olgan ulug‘vor dasturlarini izchil amalga oshiryapti”, — deyiladi xabarda.
Tahlilchilar eksportning 12 foizga o‘sishini prognoz qilib, buni O‘zbekistonning eng yetakchi savdo hamkori bo‘lgan Xitoyning ortib borayotgan ehtiyoji bilan bog‘lamoqda.
“2019-yilda O‘zbekiston rekord qiymatda (2,3 milliard dollar) to‘g‘ridan to‘g‘ri xorijiy investitsiyalar oqimini qabul qildi. Yaqin yillar ichida ushbu ko‘rsatkich o‘sishni davom etishini kutyapmiz, chunki mamlakatning yanada ko‘proq strategik sektorlari (ayniqsa, energetika sohasi) xorij biznesi uchun ochilmoqda”, — deyiladi xabarda.
Xatarlar borasida Fitch ularni muvozanatda deb hisoblaydi. Asosiy xavf koronavirus infeksiyasining yana bir ehtimoliy to‘lqini sabab hukumat tomonidan joriy etiladigan yangi cheklovlar oqibatida yuzaga kelishi mumkin.
“Ushbu xatarlar 2021-yilning o‘rtalarida tezlashishi kutilayotganidek, koronavirusga qarshi vaksinalarning tarqalishi bilan bosqichma-bosqich kamayib boradi”, — deya qayd etiladi xabarda.
Izoh (0)