2021 йилда Ўзбекистон ялпи ички маҳсулоти 5,1 фоизга ўсади. Бу ҳақда Fitch Solutions рейтинг агентлигининг прогнозига таяниб, Spot хабар берди.
«Биз ўз прогнозларимизни мамлакатнинг COVID-19 туфайли юзага келган инқироз таъсиридан жорий йилда чиқиб кетиши сабаб оширдик. 2020 йилда маҳаллий иқтисодиёт анчайин зарбаларни бошидан кечирганига қарамай, пандемия даврида барқарорлигини намоён этди ва таназзулдан нарида турган дунёдаги кам сонли давлатлар қаторидан жой олди», — дея тушунтиради таҳлилчилар.
Шунингдек, маълум қилинишича, бу ўз навбатида яқин чоракларда иқтисодий ўсиш пойдеворини яратиш имконини беради:
Агентлик келгуси чоракларда ички ва ташқи талабнинг сезиларли даражада тикланишини кутмоқда, чунки чеклаш чоралари мамлакат ичида ва четда аста-секин енгиллашмоқда.
«Асосий капиталга йўналтириладиган сармоялар миқдори 14 фоизга ошишини кутяпмиз. Чунки корхоналар ишлаб чиқаришни кенгайтириб боряпти, ҳукумат эса янгиланиш ва модернизация бўйича белгилаб олган улуғвор дастурларини изчил амалга оширяпти», — дейилади хабарда.
Таҳлилчилар экспортнинг 12 фоизга ўсишини прогноз қилиб, буни Ўзбекистоннинг энг етакчи савдо ҳамкори бўлган Хитойнинг ортиб бораётган эҳтиёжи билан боғламоқда.
«2019 йилда Ўзбекистон рекорд қийматда (2,3 миллиард доллар) тўғридан-тўғри хорижий инвестициялар оқимини қабул қилди. Яқин йиллар ичида ушбу кўрсаткич ўсишни давом этишини кутяпмиз, чунки мамлакатнинг янада кўпроқ стратегик секторлари (айниқса, энергетика соҳаси) хориж бизнеси учун очилмоқда», — дейилади хабарда.
Хатарлар борасида Fitch уларни мувозанатда деб ҳисоблайди. Асосий хавф коронавирус инфекциясининг яна бир эҳтимолий тўлқини сабаб ҳукумат томонидан жорий этиладиган янги чекловлар оқибатида юзага келиши мумкин.
«Ушбу хатарлар 2021 йилнинг ўрталарида тезлашиши кутилаётганидек, коронавирусга қарши вакциналарнинг тарқалиши билан босқичма-босқич камайиб боради», — дея қайд этилади хабарда.
Изоҳ (0)