Tashqi mehnat migratsiyasi agentligi Rossiyada bo‘lib turgan O‘zbekiston fuqarolariga ogohlantirish bilan chiqdi.
Unda so‘nggi kunlarda Rossiyaning turli hududlarida davlat rasman ruxsat bermagan ommaviy namoyishlar bo‘lib o‘tayotgani, shu munosabat bilan, bunday ommaviy namoyishlarda ishtirok etmaslikka, Rossiya qonunlariga rioya etishga va odamlar ko‘p to‘planayotgan joylarga bormaslikka chaqirilgan.
“Bu kabi rasman ruxsat berilmagan tadbirlarda qatnashish chet el fuqarolari uchun Rossiya qonunlariga muvofiq jinoiy javobgarlikka tortilish yoki davlatdan majburiy chiqarib yuborishga olib kelishi mumkin”, — deyiladi agentlik xabarida.
Eslatib o‘tamiz, Rossiyaning turli shaharlarida, xususan, Moskvada, Sankt-Peterburg, Krasnoyarsk, Nijniy Novgorod, Tver va boshqa shaharlarda siyosatchi Aleksey Navalniyni qo‘llab-quvvatlab aksiyalar o‘tkazildi.
23-yanvar kuni to‘rt mingdan ortiq, 31-yanvar kuni — besh mingdan ortiq odam hibsga olindi. Ko‘p yillardan buyon bunaqasi bo‘lmagandi. Federal telekanallar “xushmuomala politsiyachilar” haqida hikoya qildi, aslida esa ular namoyishchilarga qarshi dubinka, elektroshoker va ko‘zni yoshlantiruvchi gaz qo‘llagan edi (Kreml buni provokatsiyaga javob deb atadi). Aksiyalardan keyin kamida 40 ta jinoyat ishi qo‘zg‘atildi.
Izoh (0)