«Дарё»да эълон қилинган «Шаҳрисабз шаҳридаги ‘роддом’нинг бир қисми сотилгани айтилди. Шаҳарнинг ёш ҳокими эса масалага ойдинлик киритди» сарлавҳали мақолага вилоят соғлиқни сақлаш бошқармаси муносабат билдирди.
Маълум қилинишича, шаҳар тиббиёт бирлашмасига қарашли туғруқ бўлими сотилмаган, ижарага берилган.
«Шаҳрисабз шаҳар туғруқ комплексининг 150 ўринга мўлжалланган биноси 1984 йилда қурилиб, фойдаланишга топширилган. Бино 2005 йилда қайта таъмирланган. Туғруқ комплексининг барча блоклари қайта таъмирга муҳтож бўлишига қарамай, 2016 йилда фақат 1-блоки қайта таъмирланган.
Шаҳрисабз шаҳри 2018 йил тумандан алоҳида ажралиб чиққанидан кейин шаҳар тиббиёт бирлашмаси шифохонаси 345 ўринли шифохона сифатида фаолият бошлади. Туғруқ бўлими айни пайтда юқоридаги видеомурожаатда айтилганидек 140 ўринли эмас, балки 65 ўринли ҳисобланади. Шунингдек, туғруқ комплексида гинекология бўлимида 15, ҳомиладорлар патологияси бўлимида 30 ўрин мавжуд», — дейилади бошқарма ахборот хизмати муносабатида.
Бошқарма масъулларининг таъкидлашича, туман туғруқ комплекси 2018 йил 5 июлдан жорий таъмирлашга ёпилгани сабабли шаҳар туғруқхонасидаги таъмирталаб, шу кунгача фаолият кўрсатмайдиган бинода шаҳар давлат санитария-эпидемиология назорати маркази рухсати билан туман ҳудудидаги ҳомиладор аёлларни қабул қилиш учун вақтинча, фақатгина 3 ой мобайнида тиббий хизмат ташкил этилган.
«Видеомурожаатда қайд этилган туғруқхона биносининг бир қисми сотиб юборилди, деган даъволар мутлақо асоссиз. 2019 йил январь ойида шаҳар тиббиёт бирлашмаси 3 йилдан буён фойдаланилмасдан келган таъмирталаб бинонинг 1-қаватидаги 27,25 квадрат метр жойи шошилинч тиббий ёрдам бўлими врачи М.Эгамбердиевга 5 йиллик шартнома билан ҳамда 141,22 квадрат метр жойи видеомурожаатда айтилганидек И.Мансуровга эмас, балки акушер-гинеколог Ф.Қурбоновага қонуний тарзда хусусий шерикчилик асосида ишлаш учун 1 йиллик шартнома билан ижарага берилган. 2020 йил 22 январь ойидан Шаҳрисабз шаҳар тиббиёт бирлашмаси маъмурияти томонидан шартнома яна 5 йилга узайтирилган», — дея маълумот беради бошқарма ахборот хизмати.
Қўшимча қилинишича, 2019 йилда Шаҳрисабз шаҳар туғруқ комплекси биносини таъмирлаш учун маҳаллий бюджетдан 3 миллиард сўм ажратилган. Туғруқ бўлими биносининг 2-блоки том қисми алмаштирилиши бошланганидан кейин таъмирлаш ишлари тўхтаб қолган. 2021 йилда мазкур бинони тўлиқ реконструкция қилиш ва қўшимча бино қуриш бўйича таклифлар тегишли идораларга тақдим этилган.
Эслатиб ўтамиз, аввалроқ туғруқхона ҳамшираси шаҳарни 10 кун муддатга бошқарган ёш ҳокимига мурожаат қилиб, «Шифокорларнинг дарди кўп. Энг асосий муаммо ‘роддом’нинг сотилгани бўлди. Шу пайтга қадар ‘роддом’ сотилмаганди. Лекин 2018 йил сотилди. Биз бу ҳақда тегишли ташкилотларга мурожаат қилдик. Ҳатто депутатларга ҳам бу ҳақда хабар бериб, уларни муаммодан бохабар қилдик. Аммо муаммо ҳалигача ечилмай қолмоқда», деганди. Туғруқ бўлими бошлиғи Шокир Умаров эса бўлим 140 койкали икки блокдан иборат бўлиб, биринчи блогининг бир қавати шаҳар тиббиёт бирлашмасида фаолият юритувчи икки нафар шифокорга, тадбиркор сифатида ижарага берилганини маълум қилганди.
Изоҳ (0)