O‘zbekistonda biznesning joriy holatdagi ko‘rsatkichi yanvar oyida dekabrga nisbatan 17 punktga oshib, 50 punktga yetdi. Bu Iqtisodiy tadqiqotlar va islohotlar markazi tomonidan o‘tkazilgan so‘rovlar natijasidan kelib chiqqan holda tadbirkorlarning ijobiy fikrlarini tavsiflaydi, deb xabar beradi “Gazeta.uz”.
Butun mamlakat bo‘ylab ikki yo‘nalishda o‘tkazilgan so‘rovnomada 1005 ta korxona ishtirok etgan: unda biznesning hozirgi holati va keyingi ikki—uch oyda tadbirkorlarning o‘z biznesini rivojlantirishga bo‘lgan umidlari sifatli baholangan.
Qishloq xo‘jaligi sohasida hozirgi holat indikatori pandemiya boshidan buyon rekord darajadagi 45 punktga o‘sgan, qurilish sohasida — 30 punktga, sanoatda — 4 punktga. Xizmat ko‘rsatishda esa o‘sish 3 punktni tashkil etgan.
Tahlillarga ko‘ra, so‘rovnomada ishtirok etgan 1005 ta korxonaning 38 foizi hozirgi biznesni “yaxshi” deb baholagan, 45 foizi — “qoniqarli” va 17 foizi — “yomon”.
Respondentlarning 42 foizining ma’lum qilishicha, tovar/xizmatlarga bo‘lgan talab “yaxshilangan”, 45 foizining hisoblashicha — “o‘zgarmagan”, 13 foizi — “yomonlashgan”. Korxonalarning 18 foizida ishchilar soni “oshgan”, 74 foizida — “o‘zgarmagan”, 8 foizida — “kamaygan”.
Keyingi uch oyda biznesni rivojlantirish istiqbollarini kutish ko‘rsatkichi 16 puntga ko‘tarilib, 89 punktni tashkil etgan. Qishloq xo‘jaligi sohasidagi o‘sish kutilmalari 5 punktni, sanoatda — 26 punktni, qurilishda — 19 punktni va xizmatlarda 14 punktni tashkil etmoqda.
So‘rovnomada ishtirok etganlarning 79 foizi istiqbolda biznes “yaxshilanadi” deb baholagan bo‘lsa, 20 foizi “o‘zgarmaydi” degan va 1 foizi “yomonlashishi” mumkinligini bildirgan.
Tovar/xizmatlarga bo‘lgan talab korxonalarning 73 foizida “yaxshilanishi” kutilmoqda, 25 foizining “o‘zgarmasligiga” ishonchi komil bo‘lsa, 2 foizi “yomonlashishi”ni kutmoqda.
Korxonalarning yarmidan ortig‘i (66 foizi) keyingi uch oy ichida xodimlari sonining “ortishini” rejalashtirmoqda, 33 foizi esa ishchilar soni “o‘zgarmasligini” ma’lum qilgan bo‘lsa, 1 foizi — “kamayadi” degan.
Korxonalarning 22 foizi o‘zlarining tovar/xizmatlari narxi “ko‘tarilishini” prognoz qilayotgan bir paytda 28 foizi “o‘zgarmasligiga” ishonchi komil, 2 foizi “kamayishini” kutmoqda, 48 foizi esa ishlab chiqariladigan tovar va xizmatlarining qiymati qanday o‘zgarishini “bilmasligi”ni ma’lum qilgan.
Biznes-muhit indikatori ketma-ket ikkinchi oy sezilarli o‘sishni ko‘rsatmoqda, 17 punktga oshgan va yanvarda 69 punktni tashkil etgan. Ekspertlar mamlakatdagi biznes-muhitni “yaxshi” deya baholamoqda.
Sezilarli o‘sishni (26 punktga) qishloq xo‘jaligi sohasidagi biznes-muhit indikatori ko‘rsatgan, sanoatdagi o‘sish esa 14 punktga, qurilish va xizmatlardagi o‘sish mos ravishda 25 va 9 punktga teng.
Iqtisodiy tadqiqotlar va islohotlar markazi ma’lumotlariga ko‘ra, yanvar oyida asosiy sherik-mamlakatlar uchun biznes-muhit ko‘rsatkichlari Turkiyada 7 ni, Xitoyda — 1,3 va Janubiy Koreyada — -15 ni tashkil etgan.
Izoh (0)