O‘zbekistonda faoliyat olib borayotgan bir qator qurilish-pudrat tashkilotlari (developerlar) O‘zbekiston qurilish-pudrat tashkilotlari assotsiatsiyasini tuzdi. Assotsiatsiya vakillarining “Daryo”ga ma’lum qilishicha, tashkilot 2020-yil 11-dekabr kuni Adliya vazirligi tomonidan ro‘yxatga olingan.
Assotsiatsiyaga hozirgacha Far Flung Invest, First Development Group (FDG), Murad Buildings, Nazarov Rakhimbayev Group (NRG), Perspective Building (Novastroy), Power Construction Planet (Discover Invest) kabi qurilish-pudrat kompaniyalari a’zo bo‘lib kirgan. Ta’kidlanishicha, assotsiatsiyaga kirish ixtiyoriy.
O‘zbekiston qurilish-pudrat tashkilotlari assotsiatsiyasi qurilish sohasini rivojlantirishda davlat organlariga har tomonlama ko‘mak ko‘rsatish, sohaga doir qonunchilikni takomillashtirish bo‘yicha takliflar tayyorlash, ilg‘or xalqaro tajribani o‘rganish, zamonaviy texnologiyalar va innovatsion g‘oyalarni joriy etish niyatida.
Shuningdek, assotsiatsiya unga a’zo bo‘lib kirgan qurilish-pudrat tashkilotlarining huquqlarini va qonuniy manfaatlarini himoya qilishni ham maqsad qilgan. Bundan tashqari, qurilish sohasidagi mutaxassislarning malakasini oshirish va tajriba almashish maqsadida o‘quv va biznes-tadbirlar o‘tkazish
“Qurilish sohasining jadal rivojlanib borishi va qonuniy o‘zgarishlar shuni ko‘rsatadiki, bizga qurilish jarayonlarining shaffofligini oshiradigan, qurilish-pudrat tashkilotlarini birlashtiradigan, hukumat va ko‘chmas mulk xaridorlari bilan ikki tomonlama hamkorlikni yo‘lga qo‘yadigan professional tashkilot darkor. Biz ushbu tashkilot davlat va qurilish-pudrat kompaniyalari o‘rtasida mustahkam bog‘lovchi bo‘g‘inga aylanishiga umid qilamiz”, - deydi assotsiatsiya raisi Mansurjon Niyozmuhammedov.
Ma’lumot uchun, Qurilish tarmog‘ini modernizatsiya qilish, jadal va innovatsion rivojlantirishning 2021—2025-yillarga mo‘ljallangan strategiyasida O‘zbekistonda me’morchilik va qurilish sohasidagi nodavlat notijorat tashkilotlar ahamiyatini oshirish zarurligi alohida ko‘rsatib o‘tilgan.
Avvalroq, 2020-yil yanvarida Murad Buildings kompaniyasi rahbari Murod Nazarov “Daryo”ga bergan intervyusida O‘zbekistonda uy-joy quruvchi tashkilotlar assotsiatsiyasini tuzish maqsad qilinganini aytib o‘tgan edi.
Izoh (0)