Ўзбекистонда бизнеснинг жорий ҳолатдаги кўрсаткичи январь ойида декабрга нисбатан 17 пунктга ошиб, 50 пунктга етди. Бу Иқтисодий тадқиқотлар ва ислоҳотлар маркази томонидан ўтказилган сўровлар натижасидан келиб чиққан ҳолда тадбиркорларнинг ижобий фикрларини тавсифлайди, деб хабар беради «Gazeta.uz».
Бутун мамлакат бўйлаб икки йўналишда ўтказилган сўровномада 1005 та корхона иштирок этган: унда бизнеснинг ҳозирги ҳолати ва кейинги икки—уч ойда тадбиркорларнинг ўз бизнесини ривожлантиришга бўлган умидлари сифатли баҳоланган.
Қишлоқ хўжалиги соҳасида ҳозирги ҳолат индикатори пандемия бошидан буён рекорд даражадаги 45 пунктга ўсган, қурилиш соҳасида — 30 пунктга, саноатда — 4 пунктга. Хизмат кўрсатишда эса ўсиш 3 пунктни ташкил этган.
Таҳлилларга кўра, сўровномада иштирок этган 1005 та корхонанинг 38 фоизи ҳозирги бизнесни «яхши» деб баҳолаган, 45 фоизи — «қониқарли» ва 17 фоизи — «ёмон».
Респондентларнинг 42 фоизининг маълум қилишича, товар/хизматларга бўлган талаб «яхшиланган», 45 фоизининг ҳисоблашича — «ўзгармаган», 13 фоизи — «ёмонлашган». Корхоналарнинг 18 фоизида ишчилар сони «ошган», 74 фоизида — «ўзгармаган», 8 фоизида — «камайган».
Кейинги уч ойда бизнесни ривожлантириш истиқболларини кутиш кўрсаткичи 16 пунтга кўтарилиб, 89 пунктни ташкил этган. Қишлоқ хўжалиги соҳасидаги ўсиш кутилмалари 5 пунктни, саноатда — 26 пунктни, қурилишда — 19 пунктни ва хизматларда 14 пунктни ташкил этмоқда.
Сўровномада иштирок этганларнинг 79 фоизи истиқболда бизнес «яхшиланади» деб баҳолаган бўлса, 20 фоизи «ўзгармайди» деган ва 1 фоизи «ёмонлашиши» мумкинлигини билдирган.
Товар/хизматларга бўлган талаб корхоналарнинг 73 фоизида «яхшиланиши» кутилмоқда, 25 фоизининг «ўзгармаслигига» ишончи комил бўлса, 2 фоизи «ёмонлашиши»ни кутмоқда.
Корхоналарнинг ярмидан ортиғи (66 фоизи) кейинги уч ой ичида ходимлари сонининг «ортишини» режалаштирмоқда, 33 фоизи эса ишчилар сони «ўзгармаслигини» маълум қилган бўлса, 1 фоизи — «камаяди» деган.
Корхоналарнинг 22 фоизи ўзларининг товар/хизматлари нархи «кўтарилишини» прогноз қилаётган бир пайтда 28 фоизи «ўзгармаслигига» ишончи комил, 2 фоизи «камайишини» кутмоқда, 48 фоизи эса ишлаб чиқариладиган товар ва хизматларининг қиймати қандай ўзгаришини «билмаслиги»ни маълум қилган.
Бизнес-муҳит индикатори кетма-кет иккинчи ой сезиларли ўсишни кўрсатмоқда, 17 пунктга ошган ва январда 69 пунктни ташкил этган. Экспертлар мамлакатдаги бизнес-муҳитни «яхши» дея баҳоламоқда.
Сезиларли ўсишни (26 пунктга) қишлоқ хўжалиги соҳасидаги бизнес-муҳит индикатори кўрсатган, саноатдаги ўсиш эса 14 пунктга, қурилиш ва хизматлардаги ўсиш мос равишда 25 ва 9 пунктга тенг.
Иқтисодий тадқиқотлар ва ислоҳотлар маркази маълумотларига кўра, январь ойида асосий шерик-мамлакатлар учун бизнес-муҳит кўрсаткичлари Туркияда 7 ни, Хитойда — 1,3 ва Жанубий Кореяда — -15 ни ташкил этган.
Изоҳ (0)