Tashqi ishlar vazirligi 3-fevral, chorshanba kuni polshalik jurnalist Agneshka Pikuliskani Al Jazeera telekanalining (Qatar) O‘zbekistondagi muxbiri sifatida akkreditatsiya qildi, deb xabar bermoqda vazirlik matbuot xizmati.
Eslatib o‘tamiz, 1-fevral kuni ushbu jurnalist O‘zbekiston TIV xodimi unga tegajog‘lik qilganidan shikoyat qilgandi. Xodim unga nafaqat tegajog‘lik qilgan, balki “salbiy yangiliklar ko‘payib ketgan”i sababli undan karantin haqida ijobiy maqola yozishni so‘ragan.
Keyin jurnalist uning ustidan shikoyat yozishini aytgan. Shundan so‘ng TIV xodimi Telegram’dagi yozishmalarni o‘chirgan. Shikoyat bo‘yicha esa Agneshka Pikuliskaga hech kim javob qaytarmagan.
Oliy Majlis Senati raisi Tanzila Norboyeva ushbu holatga munosabat bildirib, ushbu hodisa puxta o‘rganilib, tahlil qilinishi, tegishli choralar ko‘rilib, aybdorlar jazolanishini ma’lum qilgandi. Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham bunga munosabat bildirib, bu shikoyati juda jiddiy xavotir uyg‘otganini aytdi.
2-fevral kuni Agneshka Pikuliska vazirlik vakillari bilan uchrashgan, ammo unga tegajog‘lik qilgan Rustam ismli kishini bir necha marta TIV binosida ko‘rgan bo‘lsa ham, vazirlikda uni hech kim tanimagan.
Shu kuni O‘zbekiston TIV polshalik jurnalistdan uzr so‘radi va unga tegajog‘lik qilgan xodimini ishdan bo‘shatganini ma’lum qildi.
Izoh (0)