Messining samoga qaratilgan qo‘llari, Jezusning sirli qo‘ng‘irog‘i va Ronalduning parvozi. Futbol yulduzlarining gollarni nishonlashi nimani anglatadi?

Istalgan futbolchi maydonga tushibdiki, jamoasiga naf keltirishga va g‘alabada muhim rolni bajarishni xohlaydi. Futbolda yana bir jihat bo‘lib, bu har qanday o‘yinchining faoliyatidagi eng quvonchli lahzalar hisoblanadi. Bu raqib darvozasini ishg‘ol qilish, ya’ni gol urishdir. Agar ba’zilar yilda, oyda bir gol ursa, Krishtianu Ronaldu, Lionel Messi singari futbolchilar o‘n yillardan beri har mavsumda eng kamida 20 tadan gol urib keladi. Aynan gol urganda ko‘plab futbolchilar hissiyotlarini jilovlay olmay, tushunarsiz va ma’nosiz harakatlarni amalga oshiradi. Lekin shunday charm to‘p ustalari ham borki, ularning golni nishonlashida alohida ma’no yotadi. Hozir aynan shular haqida suhbatlashamiz.

Lionel Messizning samoga qaratilgan qo‘llari

Zamonamizning eng yaxshi hujumchilaridan birining gol urishda tengi yo‘q ekanligi haqida yuqorida gapirildi. Messi deyarli har bir golini qo‘llarini samoga qaratgan holda nishonlaydi.

Uning o‘zi bu harakatini quyidagicha izohlaydi:

“Bunday qilishimga sabab, men gollarimni buvimga bag‘ishlayman. U meni futbolga olib kelgan, biroq hozir mening nimalarga erishganimni ko‘rmadi. Ammo buvim men va oilamga yordam berishda davom etmoqda”.

Nima ham deyish mumkin, hatto futbol dahosi Messi ham buvisiga ehtirom ko‘rsatib, unga minnatdorchilik bildirmoqda. Shunday ekan, biz ham yaqinlarimizning qadriga yetaylik.

Krishtianu Ronalduning parvozi va “Si” nomli qichqirig‘i

Ronalduning bu kabi narsalarga (golni nishonlash, sochni turmaklash, hech kimda yo‘q butsa kiyish va hokazolar) alohida mehr berishi haqida ortiqcha gapirmagan ma’qul. Krish so‘nggi yillarda shunday bir uslubni o‘ylab topdiki, deyarli har bir golini ana shu ko‘rinishda nishonlaydi. Balandga sakrab, yerga burilgan holda tushadi va “Si” (ispan tilian tarjima qilinganda “ha” degan ma’noni beradi) deb baqirish uning imzosiga aylanib ulgurdi.

Portugaliyalikning o‘zi bu uslubning paydo bo‘lgani (2013-yilgi mavsum oldidan tashkil etilgan “Real” — “Chelsi” o‘yinida) haqida shunday deydi:

“Men buning qanday paydo bo‘lganini bilmayman. Gol urdim va sakradim. Bu menga yoqdi va buni tez-tez qila boshladim. Ko‘rdimki, muxlislarga ham yoqa boshladi, shuning uchun bu ishni qilishda davom etdim. Men har doim eng yaxshi narsalar tabiiy ravishda paydo bo‘lishini aytganman”.

Paulo Dibala — “Gladiator”

O‘z vaqtida “Yuventus” va Argentina terma jamoasi hujumkor yarim himoyachisi Paulo Dibalaning yuzini qo‘li bilan berkitgan holda gol nishonlashi mashhurlik bilan bir qatorda yaxshigina shov-shuvlarga ham sabab bo‘lgandi. Dibalaning o‘zidan nima sababdan aynan shunday qilishi so‘ralganida, u buni kinofilmda ko‘rganligini aytgandi.

“Men ‘Gladiator’ filmini ko‘rganimda gollarimni shunday nishonlashga qaror qilgandim. Bu gladiator niqobi”, — degandi Dibala.

Pyer-Emerik Obameyang — “Betmen”

Bir necha yillar davomida Dortmundning “Borussiya”sida to‘p surgan va u yerda o‘zining gollarni g‘alati nishonlashi bilan yodda qolgan “Arsenal” hujumchisi Obameyang bir safar o‘z golini Betmen (komikslar qahramoni) niqobida nishonlagandi va ko‘plab shov-shuvlarga sabab bo‘lgandi. Yaqinda “Real” yarim himoyachisi Toni Kross uni ana shu qiliqlari uchun tanqid ostiga olganida, gabonlik bu harakatlarining barchasini shunchaki ko‘ngilxushlik emas, balki farzandlarini xursand qilish uchun qilganini aytdi.

Gabriel Jezusning javobsiz qo‘ng‘iroqlari

“Manchester Siti”ning braziliyalik hujumchisi barcha gollaridan so‘ng kimgadir qo‘ng‘iroq qilayotgani aks etgan harakatni amalga oshiradi va bu bilan o‘zining shu darajaga yetib kelishida asosiy rolni o‘ynagan onasiga minnatdorchilik bildiradi.

“Onam mening haqiqiy qahramonimdir. Shuning uchun gol ursam, u maydonda bo‘lmasa ham ‘trubkani ko‘taraman’ va onam bilan suhbatlashaman. ‘Allo, Onajon!’ Men shu harakatni takrorlar ekanman, buni nafaqat onam uchun, balki oila a’zolarim, yaqinlarim, do‘stlarim, murabbiy Mamede va Braziliyadagi mening hozirgi Jezus bo‘lishim uchun yordam berganlarga bag‘ishlayman”.

Ana shunaqa do‘stlar, futbol — katta kuch. Shunchaki undan qanday va to‘g‘ri foydalanishni bilish kerak, xolos.