Исталган футболчи майдонга тушибдики, жамоасига наф келтиришга ва ғалабада муҳим ролни бажаришни хоҳлайди. Футболда яна бир жиҳат бўлиб, бу ҳар қандай ўйинчининг фаолиятидаги энг қувончли лаҳзалар ҳисобланади. Бу рақиб дарвозасини ишғол қилиш, яъни гол уришдир. Агар баъзилар йилда, ойда бир гол урса, Криштиану Роналду, Лионель Месси сингари футболчилар ўн йиллардан бери ҳар мавсумда энг камида 20 тадан гол уриб келади. Айнан гол урганда кўплаб футболчилар ҳиссиётларини жиловлай олмай, тушунарсиз ва маъносиз ҳаракатларни амалга оширади. Лекин шундай чарм тўп усталари ҳам борки, уларнинг голни нишонлашида алоҳида маъно ётади. Ҳозир айнан шулар ҳақида суҳбатлашамиз.
Лионель Мессизнинг самога қаратилган қўллари
Замонамизнинг энг яхши ҳужумчиларидан бирининг гол уришда тенги йўқ эканлиги ҳақида юқорида гапирилди. Месси деярли ҳар бир голини қўлларини самога қаратган ҳолда нишонлайди.
Унинг ўзи бу ҳаракатини қуйидагича изоҳлайди:
«Бундай қилишимга сабаб, мен голларимни бувимга бағишлайман. У мени футболга олиб келган, бироқ ҳозир менинг нималарга эришганимни кўрмади. Аммо бувим мен ва оиламга ёрдам беришда давом этмоқда».
Нима ҳам дейиш мумкин, ҳатто футбол даҳоси Месси ҳам бувисига эҳтиром кўрсатиб, унга миннатдорчилик билдирмоқда. Шундай экан, биз ҳам яқинларимизнинг қадрига етайлик.
Криштиану Роналдунинг парвози ва «Си» номли қичқириғи
Роналдунинг бу каби нарсаларга (голни нишонлаш, сочни турмаклаш, ҳеч кимда йўқ бутса кийиш ва ҳоказолар) алоҳида меҳр бериши ҳақида ортиқча гапирмаган маъқул. Криш сўнгги йилларда шундай бир услубни ўйлаб топдики, деярли ҳар бир голини ана шу кўринишда нишонлайди. Баландга сакраб, ерга бурилган ҳолда тушади ва «Си» (испан тилиан таржима қилинганда «ҳа» деган маънони беради) деб бақириш унинг имзосига айланиб улгурди.
Португалияликнинг ўзи бу услубнинг пайдо бўлгани (2013 йилги мавсум олдидан ташкил этилган «Реал» — «Челси» ўйинида) ҳақида шундай дейди:
«Мен бунинг қандай пайдо бўлганини билмайман. Гол урдим ва сакрадим. Бу менга ёқди ва буни тез-тез қила бошладим. Кўрдимки, мухлисларга ҳам ёқа бошлади, шунинг учун бу ишни қилишда давом этдим. Мен ҳар доим энг яхши нарсалар табиий равишда пайдо бўлишини айтганман».
Пауло Дибала — «Гладиатор»
Ўз вақтида «Ювентус» ва Аргентина терма жамоаси ҳужумкор ярим ҳимоячиси Пауло Дибаланинг юзини қўли билан беркитган ҳолда гол нишонлаши машҳурлик билан бир қаторда яхшигина шов-шувларга ҳам сабаб бўлганди. Дибаланинг ўзидан нима сабабдан айнан шундай қилиши сўралганида, у буни кинофильмда кўрганлигини айтганди.
«Мен ‘Гладиатор’ фильмини кўрганимда голларимни шундай нишонлашга қарор қилгандим. Бу гладиатор ниқоби», — деганди Дибала.
Пьер-Эмерик Обамеянг — «Бетмен»
Бир неча йиллар давомида Дортмунднинг «Боруссия»сида тўп сурган ва у ерда ўзининг голларни ғалати нишонлаши билан ёдда қолган «Арсенал» ҳужумчиси Обамеянг бир сафар ўз голини Бетмен (комикслар қаҳрамони) ниқобида нишонлаганди ва кўплаб шов-шувларга сабаб бўлганди. Яқинда «Реал» ярим ҳимоячиси Тони Кросс уни ана шу қилиқлари учун танқид остига олганида, габонлик бу ҳаракатларининг барчасини шунчаки кўнгилхушлик эмас, балки фарзандларини хурсанд қилиш учун қилганини айтди.
Габриэль Жезуснинг жавобсиз қўнғироқлари
«Манчестер Сити»нинг бразилиялик ҳужумчиси барча голларидан сўнг кимгадир қўнғироқ қилаётгани акс этган ҳаракатни амалга оширади ва бу билан ўзининг шу даражага етиб келишида асосий ролни ўйнаган онасига миннатдорчилик билдиради.
«Онам менинг ҳақиқий қаҳрамонимдир. Шунинг учун гол урсам, у майдонда бўлмаса ҳам ‘трубкани кўтараман’ ва онам билан суҳбатлашаман. ‘Алло, Онажон!’ Мен шу ҳаракатни такрорлар эканман, буни нафақат онам учун, балки оила аъзоларим, яқинларим, дўстларим, мураббий Мамеде ва Бразилиядаги менинг ҳозирги Жезус бўлишим учун ёрдам берганларга бағишлайман».
Ана шунақа дўстлар, футбол — катта куч. Шунчаки ундан қандай ва тўғри фойдаланишни билиш керак, холос.
Бошқа мақолалар:
Изоҳ (0)