Koronavirus infeksiyasining paydo bo‘lish sabablarini o‘rganayotgan Jahon sog‘liqni saqlash tashkiloti (JSST) ekspertlari Uxan virusologiya institutiga tashrif buyurdi. Avvalroq AQShda SARS-CoV-2 infeksiyasi Uxan laboratoriyasida yaratilgani aytilgan edi. Bu haqda “RBK” xabar berdi.
“Berilishi kerak bo‘lgan savollarni so‘rash uchun ushbu samarali kunni sabrsizlik bilan kutyapmiz”, — dedi EcoHealth Alliance nodavlat notijorat tashkiloti prezidenti, ekspert Piter Dazsak institutga kelishidan oldin.
Avvalroq JSSTning virusologiya, oziq-ovqat mahsulotlari va epidemiologiya mutaxassislari Xuanan dengiz mahsulotlari bozoriga va shahardagi eng katta go‘sht mahsulotlari sotiladigan Bayshachjou bozoriga tashrif buyurgan edi. Ungacha ular Uxandagi bemorlarni birinchilardan bo‘lib davolaydigan ikkita kasalxonada bo‘ldi. 14 kunlik karantindan keyin ekspertlar ishga kirishdi.
Yanvar oyi boshida AQShning sobiq prezidenti Donald Trampning milliy xavfsizlik bo‘yicha maslahatchisi o‘rinbosari Metyu Pottingerning aytishicha, koronavirusning Uxan laboratoriyasida yaratilganiga ishora qiluvchi “dalillar tobora ortib bormoqda”. 2020-yilning may oyida Tramp ham bu haqida gapirgan edi. U Xitoy rahbariyatini virus tarqalishi bilan bog‘liq ma’lumotlarni yashirishda ayblagan.
Xitoy tashqi ishlar vaziri Van Ining ta'kidlashicha, koronavirus pandemiyasi dunyoning turli davlatlarida turli xil aks-sado berdi, lekin Xitoy ushbu kasallik to‘g‘risida birinchi bo‘lib xabar qilgan.
Birinchi COVID-19 virusi bilan zararlanish holati 2019-yilda Uxan shahrida ro‘yxatga olingan. 2020-yil mart oyida JSST koronavirus epidemiyasini pandemiya deb atadi.
Izoh (0)