Jahon sog‘liqni saqlash tashkiloti (JSST) so‘nggi 7 kecha-kunduz ichida koronavirusdan vafot etganlar soni bo‘yicha butun pandemiya davridagi antirekord qayd etilganini ma’lum qildi, deb yozmoqda “RBK”.
Tashkilot ma’lumotlariga ko‘ra, 25-yanvardan 31-yanvargacha dunyoda koronavirusdan vafot etish bo‘yicha 96 364 ta holat qayd etilgan. O‘limlar sonining deyarli yarmi Shimoliy va Janubiy Amerikaga (47 277) to‘g‘ri keladi, Yevropada o‘tgan hafta ichida 36 674 nafar bemor vafot etdi. Shu bilan birga, JSST ushbu davrda COVID-19 infeksiyasiga chalinish bo‘yicha 3 686 110 ta yangi holat qayd etilganini ta’kidladi, bu 18—24-yanvar kunlarida aniqlangan holatlarga nisbatan 13 foiz kamdir.
Koronavirus qurbonlarining soni bo‘yicha so‘nggi antirekord bir hafta oldin qayd etilgan. O‘sha vaqtda JSST 95 991 ta o‘lim holati haqida xabar bergan. Infeksiya qurbonlari soni bo‘yicha avvalgi maksimal ko‘rsatkich 11—17-yanvar kunlari qayd etilgandi — 93 882 nafar kishi.
Jons Hopkins universiteti ma’lumotlariga ko‘ra, pandemiya boshlanganidan buyon dunyoda 103 866 068 nafar kishida koronavirus infeksiyasi aniqlangan, 2 252 953 nafar bemor infeksiya qurboniga aylangan. Ikkala ko‘rsatkich bo‘yicha ham AQSh yetakchi hisoblanadi.
Avvalroq AQShda maxsus itlardan sport o‘yinlarida koronavirusga chalingan tomoshabinlarni aniqlash uchun foydalanilishi haqida xabar berilgandi.
Xizmat itlaridan COVID-19 uchun “detektor” sifatida foydalanish so‘nggi oylarda Yevropada faol yo‘lga qo‘yilmoqda. Italiya politsiyasi COVID-19 yuqtirishi mumkin bo‘lgan odamlarni aniqlash uchun itni o‘rgatishga olti-sakkiz hafta vaqt kerakligini ma’lum qildi. Ushbu usulning afzalliklaridan biri shundaki, it hech qanday alomatlari bo‘lmasa ham, bemorni tezda aniqlay oladi
Izoh (0)