Armaniston poytaxti Yerevanda parlament binosi yoniga 3-fevral kuni ertalabdan namoyishchilar yig‘ildi, ular bosh vazir Nikol Pashinyanning iste’fosini talab qilmoqda, deb yozadi “Interfaks”. Politsiya aksiya ishtirokchilarini hibsga olmoqda.
Armaniston parlamentiga bir necha yuz kishi kelgan, aksiya 17 ta muxolifat partiyasini birlashtiruvchi “Vatanni qutqarish harakati” tomonidan tashkillashtirilgan.
Parlament binosiga yaqin shohko‘chani to‘sishga uringan muxolifat faollarini politsiya hibsga ola boshladi. “Sizlar politsiyaning qonuniy talablariga bo‘ysunmayapsiz”, — dedi kuch vakillari. Dastlabki ma’lumotlarga ko‘ra, o‘nga yaqin kishi hibsga olingan.
Armaniston parlamenti 3-fevral, chorshanba kuni sud kodeksiga kiritiladigan tuzatishlarni muhokama qilmoqda.
Hukmron “Mening qadamim” fraksiyasi tashabbusi bilan kiritilayotgan tuzatishlar dastlabki hibs kabi masalalarni ko‘rib chiqadigan yangi sud tuzishni ko‘zda tutadi. Hukumat qayd etishicha, amaldagi sudyalarning ko‘pchiligi alohida muxolifat yetakchilari bilan bog‘liq bo‘lgani uchun jinoyat sodir etganlikda ayblanayotgan ba’zi muxolifatchilarni dastlabki hibsga olishdan bosh tortmoqda. Muxolifat esa bosh vazir Nikol Pashinyanning hukumati ularning amriga bo‘ysunishga tayyor sudyalarni tayinlash imkoniyatiga ega bo‘ladi, deb hisoblab, bunga qarshi chiqmoqda.
Eslatib o‘tamiz, 10-noyabr kuni Tog‘li Qorabog‘ bo‘yicha bitim imzolangani, unga ko‘ra Armaniston bir qator hududlarni Ozarbayjonga topshirgani haqida xabar berilgan edi. Muxolifat Pashinyan “xoinlik” shartnomasi imzolangani sababli iste’foga chiqishini talab qildi. Shundan so‘ng bosh vazir iste’foga chiqishga tayyorligini ma’lum qildi.
Mavzuga doir:
Izoh (0)