Коронавирус инфекциясининг пайдо бўлиш сабабларини ўрганаётган Жаҳон соғлиқни сақлаш ташкилоти (ЖССТ) экспертлари Ухань вирусология институтига ташриф буюрди. Аввалроқ АҚШда SARS-CoV-2 инфекцияси Ухань лабораториясида яратилгани айтилган эди. Бу ҳақда «РБК» хабар берди.
«Берилиши керак бўлган саволларни сўраш учун ушбу самарали кунни сабрсизлик билан кутяпмиз», — деди EcоHealth Alliance нодавлат нотижорат ташкилоти президенти, эксперт Питер Дазсак институтга келишидан олдин.
Аввалроқ ЖССТнинг вирусология, озиқ-овқат маҳсулотлари ва эпидемиология мутахассислари Хуаньань денгиз маҳсулотлари бозорига ва шаҳардаги энг катта гўшт маҳсулотлари сотиладиган Байшачжоу бозорига ташриф буюрган эди. Унгача улар Ухандаги беморларни биринчилардан бўлиб даволайдиган иккита касалхонада бўлди. 14 кунлик карантиндан кейин экспертлар ишга киришди.
Январь ойи бошида АҚШнинг собиқ президенти Дональд Трампнинг миллий хавфсизлик бўйича маслаҳатчиси ўринбосари Мэтью Поттингернинг айтишича, коронавируснинг Ухань лабораториясида яратилганига ишора қилувчи «далиллар тобора ортиб бормоқда». 2020 йилнинг май ойида Трамп ҳам бу ҳақида гапирган эди. У Хитой раҳбариятини вирус тарқалиши билан боғлиқ маълумотларни яширишда айблаган.
Хитой ташқи ишлар вазири Ван Ининг таъкидлашича, коронавирус пандемияси дунёнинг турли давлатларида турли хил акс-садо берди, лекин Хитой ушбу касаллик тўғрисида биринчи бўлиб хабар қилган.
Биринчи COVID-19 вируси билан зарарланиш ҳолати 2019 йилда Ухань шаҳрида рўйхатга олинган. 2020 йил март ойида ЖССТ коронавирус эпидемиясини пандемия деб атади.
Изоҳ (0)