Jahon banki va uning hamkorlari bir qator tabiiy xavf ofatlarni, shu jumladan, zilzilalar, toshqinlar va ko‘chkilar xavfini baholash bo‘yicha noyob tashabbusni boshlamoqda. Bu haqda Asia-Plus xabar qildi.
“Ushbu tashabbus Olmaotada joylashgan Favqulodda vaziyatlar va tabiiy ofatlar xavfini kamaytirish markazi bilan yaqin hamkorlikda amalga oshirilmoqda”, – deyiladi Jahon banki xabarida.
Tashabbus Markaziy Osiyoda moliyaviy barqarorlikni mustahkamlash va tabiiy ofatlar xavfini kamaytirish dasturi doirasida Yevropa Ittifoqining moliyaviy hamkorligi va Jahon banki tomonidan Tabiiy ofatlar global jamg‘armasi rahbarligida amalga oshirilayotgani ta’kidlandi.
“Tashabbusning umumiy maqsadi – moliyaviy barqarorlikni oshirish, xatarlarni aniqlash qobiliyatlari va tabiiy ofatlar xavfini boshqarish tizimi orqali Markaziy Osiyo mamlakatlarining tabiiy ofat va iqlim xatarlariga chidamliligini kuchaytirish”, – deyiladi bayonotda.
Jahon banki ekspertlarining fikricha, xavfni baholash tizimi mintaqaviy yondashuvni hisobga olgan holda o‘ziga xosdir va ko‘plab tabiiy xavflar va sezgir obyektlarning turlari bo‘yicha muvofiqlikni ta’minlashga qaratilgan.
“Bu Markaziy Osiyo mintaqasidagi birinchi shunday urinish”, – deyiladi xabarda.
Jarayon yakunida mahalliy hokimiyat idoralari tabiiy ofatlar xavfini boshqarish strategiyasini ishlab chiqishda ishlatilishi mumkin bo‘lgan ishonchli vositaga ega bo‘lishlari kutilmoqda.
Xulosa shuki, bu jarayon mintaqadagi texnik va ilmiy jamoalarda tabiiy ofatlar xavfini tushunishni yaxshilaydi.
Jahon bankining Markaziy Osiyo bo‘yicha mintaqaviy direktori Liliya Burunchukning ta’kidlashicha, toshqinlar va zilzilalar natijasida Tojikistonning yillik iqtisodiy zararlari 400 million dollarni tashkil etgan.
Uning ma’lum qilishicha, ushbu tabiiy ofatlar qurbonlari soni respublikada har yili 500 ming kishiga etadi.
Umuman olganda, Jahon bankining vakili Markaziy Osiyo mamlakatlari har yili tabiiy ofatlar natijasida 10 milliard dollar yo‘qotayotganini ta’kidladi.
Burunchukning ta’kidlashicha, mintaqada har oyda zilzilalar xaritasi tom ma’noda qizil nuqtalar bilan to‘ladi.
Liliya Burunchuk mintaqaning har yili 3 milliongacha aholisi tabiiy ofatlardan aziyat chekishini, ularning yarmidan ko‘pi O‘zbekistonda istiqomat qilishini ta’kidladi.
Jahon bankining ma’lumotlariga ko‘ra, tabiiy ofatlarda O‘zbekistonda o‘rtacha 1,4 million kishi aziyat chekadi hamda mamlakat iqtisodiyotiga bu 2,8 milliard AQSh dollariga tushadi. Markaziy Osiyoning boshqa mamlakatlaridagi ko‘rsatkichlar quyidagicha:- Qozog‘iston – 500 ming kishi aziyat chekadi, 4 milliard iqtisodiy zarar;
- Qirg‘iziston – 200 ming kishi aziyat chekadi, 270 million iqtisodiy zarar;
- Tojikiston – 500 ming kishi aziyat chekadi, 400 million iqtisodiy zarar;
- Turkmaniston – 170 ming kishi aziyat chekadi, 2,7 milliard iqtisodiy zarar.
Avvalroq BMT oxirgi 10 yil ichida butun dunyoda 410 mingdan ziyod aholi tabiiy ofatlar oqibatida vafot etganini ta’kidlagani hamda Shavkat Mirziyoyev Buxorodagi kuchli shamol oqibatlarining oldini olish imkoniyati bo‘lganini aytgani haqida xabar berilgandi.
Izoh (0)