Жаҳон банки ва унинг ҳамкорлари бир қатор табиий хавф офатларни, шу жумладан, зилзилалар, тошқинлар ва кўчкилар хавфини баҳолаш бўйича ноёб ташаббусни бошламоқда. Бу ҳақда Asia-Plus хабар қилди.
«Ушбу ташаббус Олмаотада жойлашган Фавқулодда вазиятлар ва табиий офатлар хавфини камайтириш маркази билан яқин ҳамкорликда амалга оширилмоқда», – дейилади Жаҳон банки хабарида.
Ташаббус Марказий Осиёда молиявий барқарорликни мустаҳкамлаш ва табиий офатлар хавфини камайтириш дастури доирасида Европа Иттифоқининг молиявий ҳамкорлиги ва Жаҳон банки томонидан Табиий офатлар глобал жамғармаси раҳбарлигида амалга оширилаётгани таъкидланди.
«Ташаббуснинг умумий мақсади – молиявий барқарорликни ошириш, хатарларни аниқлаш қобилиятлари ва табиий офатлар хавфини бошқариш тизими орқали Марказий Осиё мамлакатларининг табиий офат ва иқлим хатарларига чидамлилигини кучайтириш», – дейилади баёнотда.
Жаҳон банки экспертларининг фикрича, хавфни баҳолаш тизими минтақавий ёндашувни ҳисобга олган ҳолда ўзига хосдир ва кўплаб табиий хавфлар ва сезгир объектларнинг турлари бўйича мувофиқликни таъминлашга қаратилган.
«Бу Марказий Осиё минтақасидаги биринчи шундай уриниш», – дейилади хабарда.
Жараён якунида маҳаллий ҳокимият идоралари табиий офатлар хавфини бошқариш стратегиясини ишлаб чиқишда ишлатилиши мумкин бўлган ишончли воситага эга бўлишлари кутилмоқда.
Хулоса шуки, бу жараён минтақадаги техник ва илмий жамоаларда табиий офатлар хавфини тушунишни яхшилайди.
Жаҳон банкининг Марказий Осиё бўйича минтақавий директори Лилия Бурунчукнинг таъкидлашича, тошқинлар ва зилзилалар натижасида Тожикистоннинг йиллик иқтисодий зарарлари 400 миллион долларни ташкил этган.
Унинг маълум қилишича, ушбу табиий офатлар қурбонлари сони республикада ҳар йили 500 минг кишига этади.
Умуман олганда, Жаҳон банкининг вакили Марказий Осиё мамлакатлари ҳар йили табиий офатлар натижасида 10 миллиард доллар йўқотаётганини таъкидлади.
Бурунчукнинг таъкидлашича, минтақада ҳар ойда зилзилалар харитаси том маънода қизил нуқталар билан тўлади.
Лилия Бурунчук минтақанинг ҳар йили 3 миллионгача аҳолиси табиий офатлардан азият чекишини, уларнинг ярмидан кўпи Ўзбекистонда истиқомат қилишини таъкидлади.
Жаҳон банкининг маълумотларига кўра, табиий офатларда Ўзбекистонда ўртача 1,4 миллион киши азият чекади ҳамда мамлакат иқтисодиётига бу 2,8 миллиард АҚШ долларига тушади. Марказий Осиёнинг бошқа мамлакатларидаги кўрсаткичлар қуйидагича:- Қозоғистон – 500 минг киши азият чекади, 4 миллиард иқтисодий зарар;
- Қирғизистон – 200 минг киши азият чекади, 270 миллион иқтисодий зарар;
- Тожикистон – 500 минг киши азият чекади, 400 миллион иқтисодий зарар;
- Туркманистон – 170 минг киши азият чекади, 2,7 миллиард иқтисодий зарар.
Аввалроқ БМТ охирги 10 йил ичида бутун дунёда 410 мингдан зиёд аҳоли табиий офатлар оқибатида вафот этганини таъкидлагани ҳамда Шавкат Мирзиёев Бухородаги кучли шамол оқибатларининг олдини олиш имконияти бўлганини айтгани ҳақида хабар берилганди.
Изоҳ (0)