Koronavirus pandemiyasi tufayli ortda qolgan ikki transfer oynasida (2020-yilning yozidagi va 2021-yilning yanvar oyidagi) deyarli shov-shuvli transferlar amalga oshirilmadi. Ularda asosan kutilgan va intrigasiz xaridlar kuzatildi. Biroq kelayotgan yozgi transferlar vaqtida anchayin shovqinli bitimlarning imzolanishi kutilmoqda. Ulardan eng asosiylari haqida quyida fikr yuritiladi.
Krishtianu Ronaldu (“Yuventus”)
Asosiy da’vogarlar: PSJ, “Real”, “Manchester Yunayted
So‘nggi ikki mavsumda portugaliyalik “keksa sinyora”ning eng sermahsul futbolchisiga aylandi va 2020/21-yilgi mavsumda ham nafaqat jamoasi, balki musobaqa to‘purarlar poygasida yuqori o‘rinlarda bormoqda. Ammo Krishtianuning “Yuventus”ni tark etish mumkinligi haqidagi gaplar tobora ko‘paymoqda. Turinliklar rahbariyati o‘tgan yilning yozida futbolchini sotish variantlarini ko‘rib chiqdi va hatto agenti orqali uni turli klublarga taklif ham qildi, biroq jiddiyroq hech narsa ko‘rinmadi.
“Yuventus”ning Ronalduni sotish istagini tushunsa bo‘ladi: shartnomasi 2022-yilning yozigacha tuzilgan portugaliyalik klubda eng yuqori maosh oladi (yiliga 31 million yevro), shuning uchun 117 million yevroga xarid qilingan o‘yinchini sotish uchun bu so‘nggi imkoniyat bo‘ladi. Aks holda esa Ronaldu Turin klubini erkin agent sifatida tark etishi mumkin. Ma’lumotlarga ko‘ra, ayni paytda “Yuventus” va “Manchester Yunayted” Krishtianu Ronaldu va Pol Pogbani o‘zaro almashtirish variantini ko‘rib chiqayotgan ekan.Lionel Messi (“Barselona”)
Asosiy da’vogarlar: “Inter”, PSJ, “Manchester Siti”, “Inter Mayami”
O‘tgan yozda Lionel Messi va “Barselona” o‘rtasidagi uzoq yillik hamkorlik tarixi yakun topishiga bir baxya qolgandi. Mavsum oxirida argentinalik jamoa bilan mashg‘ulot olib borishdan ochiqchasiga bosh tortdi va shartnomadagi bandni faollashtirmoqchi edi, unga ko‘ra Messi transfer oynasi vaqtida “Barselona”ni bepul tark etishi mumkin edi. Ammo bandning amal qilish muddati cheklanganligi sababli Messi maqsadiga yeta olmadi. Bundan tashqari, klub rahbariyati ham argentinalikni jamoada olib qolish uchun bor imkoniyatini ishga soldi.
Messining “Barselona” bilan shartnomasi 2021-yilning yozida o‘z nihoyasiga yetadi va hozircha uni uzaytirish haqida hech qanday gap yo‘q. Shu sababli futbolchi hozirdanoq boshqa klublar bilan muzokara olib borish huquqiga ega. Ayni paytda argentinalik yulduzga “Inter”, PSJ va “Manchester Siti” klublari qiziqish bildirmoqda. Shuningdek, Devid Bekhemning “Inter Mayami”si ham nafaqat Messi, balki uning sobiq jamoadoshi Luis Suaresga qiziqish bildirayotgani haqida xabarlar bor. Ushbu holatda Messi va Suares juftligi yana bir jamoa sharafini himoya qilishi mumkin bo‘ladi.
Kilian Mbappe (PSJ)
Asosiy nomzodlar: “Real”, “Chelsi”, “Liverpul”
2017-yildan beri PSJ sharafini himoya qilib kelayotgan Mbappening bolalikdagi orzularidan biri Parij klubida to‘p surish bo‘lgan ekan. PSJ Kilianing bu orzusi uchun 145 million yevro sarflagandi, albatta, o‘z foydasini ko‘zlagan holda. Biroq Mbappe 3,5 yil davomida Fransiya chempionatidagi doimiy ustunlik va Chempionlar Ligasidagi muntazam qoqilishlardan charchagani aniq. Boz ustiga futbolchining o‘zi ham Parij klubini tark etish istagini ochiqchasiga bildirgan. Ushbu vaziyatni diqqat bilan kuzatib borayotgan “Real” fransiyalik yulduzga asosiy da’vogarlardan biri bo‘lib turibdi. Shuningdek, “Chelsi” va “Liverpul” klublari ham da’vogarlar ro‘yxatiga kiritilgan. Biroq bu yerda ko‘pchilik “Real”ning imkoniyatlarini yuqori baholamoqda. Buning ustiga Mbappening bolalikdagi orzularidan yana biri “qirollik klubi”da o‘ynash bo‘lgan.
Muhammad Saloh (“Liverpul”)
Asosiy nomzod: “Real”
Yurgen Klopp boshchiligidagi “Liverpul”ning muvaffaqiyatlarini Muhammad Salohsiz, misrlikning o‘zini esa “Liverpul”siz tasavvur qilish mushkul. Aynan shu yerda Saloh tom ma’noda dunyo yulduziga aylandi va “mersisaydliklar”ning uzoq kutilgan Chempionlar Ligasi va Angliya Premyer Ligasidagi g‘alabalariga beqiyos hissa qo‘shdi. Ma’lumotlarga ko‘ra, hozirgi paytda Saloh yangi sarguzashtlar izlamoqda va do‘stlariga yaqin kelajakda “Real”ga o‘tishni xohlashini aytgan. O‘z navbatida ushbu kelishuv “Real” uchun ham, “Liverpul” uchun ham o‘zaro manfaatli bo‘lishi mumkin: “qirollik klubi” muammoli pozitsiyaga ajoyib futbolchini qo‘lga kiritsa, inglizlar uning o‘rniga keladigan futbolchi uchun yaxshigina mablag‘ni qo‘lga kiritishi mumkin. Misol tariqasida, yuqorida nomi qayd etilgan Mbappe uchun.
Erling Holand (“Borussiya D”)
Asosiy da’vogarlar: “Manchester Siti”, “Manchester Yunayted”, “Barselona”, “Real”, “Liverpul”, “Chelsi”
Katta ehtimol bilan bugungi kunda Yevropa grandlarining ko‘zi Erling Holandga qaratilgan. Faoliyatida aql bovar qilmas startni amalga oshirgan 20 yoshli futbolchi nafaqat debyut o‘yinlaridagi het-triklar va “Borussiya” asosiy tarkibidan joy olishi bilan, balki bir yil ichida Bundesliga darajasini ortda qoldirgani hamda dunyoning istalgan klubida o‘ynashga tayyor ekanligini isbotlagani bilan yodda qoldi. Shuning uchun hozirda har qanday klub norvegiyalikni o‘z safiga qo‘shib olishni xohlamoqda, faqat Holandning qanday qarorga kelishini kutish qoldi, xolos. Ehtimoliy bitimning potensial miqdorini ham taxmin qilish qiyin emas. Katta ehtimol bilan u 2017-yilda “Barselona”dan PSJga o‘tgan Neymarning 222 million yevrolik rekordini ortda qoldirishi mumkin.
Izoh (0)