Коронавирус пандемияси туфайли ортда қолган икки трансфер ойнасида (2020 йилнинг ёзидаги ва 2021 йилнинг январь ойидаги) деярли шов-шувли трансферлар амалга оширилмади. Уларда асосан кутилган ва интригасиз харидлар кузатилди. Бироқ келаётган ёзги трансферлар вақтида анчайин шовқинли битимларнинг имзоланиши кутилмоқда. Улардан энг асосийлари ҳақида қуйида фикр юритилади.
Криштиану Роналду («Ювентус»)
Асосий даъвогарлар: ПСЖ, «Реал», «Манчестер Юнайтед
Сўнгги икки мавсумда португалиялик «кекса синьора»нинг энг сермаҳсул футболчисига айланди ва 2020/21 йилги мавсумда ҳам нафақат жамоаси, балки мусобақа тўпурарлар пойгасида юқори ўринларда бормоқда. Аммо Криштианунинг «Ювентус»ни тарк этиш мумкинлиги ҳақидаги гаплар тобора кўпаймоқда. Туринликлар раҳбарияти ўтган йилнинг ёзида футболчини сотиш вариантларини кўриб чиқди ва ҳатто агенти орқали уни турли клубларга таклиф ҳам қилди, бироқ жиддийроқ ҳеч нарса кўринмади.
«Ювентус»нинг Роналдуни сотиш истагини тушунса бўлади: шартномаси 2022 йилнинг ёзигача тузилган португалиялик клубда энг юқори маош олади (йилига 31 миллион евро), шунинг учун 117 миллион еврога харид қилинган ўйинчини сотиш учун бу сўнгги имконият бўлади. Акс ҳолда эса Роналду Турин клубини эркин агент сифатида тарк этиши мумкин. Маълумотларга кўра, айни пайтда «Ювентус» ва «Манчестер Юнайтед» Криштиану Роналду ва Пол Погбани ўзаро алмаштириш вариантини кўриб чиқаётган экан.Лионель Месси («Барселона»)
Асосий даъвогарлар: «Интер», ПСЖ, «Манчестер Сити», «Интер Майами»
Ўтган ёзда Лионель Месси ва «Барселона» ўртасидаги узоқ йиллик ҳамкорлик тарихи якун топишига бир бахя қолганди. Мавсум охирида аргентиналик жамоа билан машғулот олиб боришдан очиқчасига бош тортди ва шартномадаги бандни фаоллаштирмоқчи эди, унга кўра Месси трансфер ойнаси вақтида «Барселона»ни бепул тарк этиши мумкин эди. Аммо банднинг амал қилиш муддати чекланганлиги сабабли Месси мақсадига ета олмади. Бундан ташқари, клуб раҳбарияти ҳам аргентиналикни жамоада олиб қолиш учун бор имкониятини ишга солди.
Мессининг «Барселона» билан шартномаси 2021 йилнинг ёзида ўз ниҳоясига етади ва ҳозирча уни узайтириш ҳақида ҳеч қандай гап йўқ. Шу сабабли футболчи ҳозирданоқ бошқа клублар билан музокара олиб бориш ҳуқуқига эга. Айни пайтда аргентиналик юлдузга «Интер», ПСЖ ва «Манчестер Сити» клублари қизиқиш билдирмоқда. Шунингдек, Дэвид Бекҳэмнинг «Интер Майами»си ҳам нафақат Месси, балки унинг собиқ жамоадоши Луис Суаресга қизиқиш билдираётгани ҳақида хабарлар бор. Ушбу ҳолатда Месси ва Суарес жуфтлиги яна бир жамоа шарафини ҳимоя қилиши мумкин бўлади.
Килиан Мбаппе (ПСЖ)
Асосий номзодлар: «Реал», «Челси», «Ливерпуль»
2017 йилдан бери ПСЖ шарафини ҳимоя қилиб келаётган Мбаппенинг болаликдаги орзуларидан бири Париж клубида тўп суриш бўлган экан. ПСЖ Килианинг бу орзуси учун 145 миллион евро сарфлаганди, албатта, ўз фойдасини кўзлаган ҳолда. Бироқ Мбаппе 3,5 йил давомида Франция чемпионатидаги доимий устунлик ва Чемпионлар Лигасидаги мунтазам қоқилишлардан чарчагани аниқ. Боз устига футболчининг ўзи ҳам Париж клубини тарк этиш истагини очиқчасига билдирган. Ушбу вазиятни диққат билан кузатиб бораётган «Реал» франциялик юлдузга асосий даъвогарлардан бири бўлиб турибди. Шунингдек, «Челси» ва «Ливерпуль» клублари ҳам даъвогарлар рўйхатига киритилган. Бироқ бу ерда кўпчилик «Реал»нинг имкониятларини юқори баҳоламоқда. Бунинг устига Мбаппенинг болаликдаги орзуларидан яна бири «қироллик клуби»да ўйнаш бўлган.
Муҳаммад Салоҳ («Ливерпуль»)
Асосий номзод: «Реал»
Юрген Клопп бошчилигидаги «Ливерпуль»нинг муваффақиятларини Муҳаммад Салоҳсиз, мисрликнинг ўзини эса «Ливерпуль»сиз тасаввур қилиш мушкул. Айнан шу ерда Салоҳ том маънода дунё юлдузига айланди ва «мерсисайдликлар»нинг узоқ кутилган Чемпионлар Лигаси ва Англия Премьер Лигасидаги ғалабаларига беқиёс ҳисса қўшди. Маълумотларга кўра, ҳозирги пайтда Салоҳ янги саргузаштлар изламоқда ва дўстларига яқин келажакда «Реал»га ўтишни хоҳлашини айтган. Ўз навбатида ушбу келишув «Реал» учун ҳам, «Ливерпуль» учун ҳам ўзаро манфаатли бўлиши мумкин: «қироллик клуби» муаммоли позицияга ажойиб футболчини қўлга киритса, инглизлар унинг ўрнига келадиган футболчи учун яхшигина маблағни қўлга киритиши мумкин. Мисол тариқасида, юқорида номи қайд этилган Мбаппе учун.
Эрлинг Ҳоланд («Боруссия Д»)
Асосий даъвогарлар: «Манчестер Сити», «Манчестер Юнайтед», «Барселона», «Реал», «Ливерпуль», «Челси»
Катта эҳтимол билан бугунги кунда Европа грандларининг кўзи Эрлинг Ҳоландга қаратилган. Фаолиятида ақл бовар қилмас стартни амалга оширган 20 ёшли футболчи нафақат дебют ўйинларидаги ҳет-триклар ва «Боруссия» асосий таркибидан жой олиши билан, балки бир йил ичида Бундеслига даражасини ортда қолдиргани ҳамда дунёнинг исталган клубида ўйнашга тайёр эканлигини исботлагани билан ёдда қолди. Шунинг учун ҳозирда ҳар қандай клуб норвегияликни ўз сафига қўшиб олишни хоҳламоқда, фақат Ҳоланднинг қандай қарорга келишини кутиш қолди, холос. Эҳтимолий битимнинг потенциал миқдорини ҳам тахмин қилиш қийин эмас. Катта эҳтимол билан у 2017 йилда «Барселона»дан ПСЖга ўтган Неймарнинг 222 миллион евролик рекордини ортда қолдириши мумкин.
Изоҳ (0)