“Real”da o‘z o‘rnini topa olmagan Martin Edegor va “Arsenal” o‘rtasidagi muzokaralar ko‘p muhokama qilindi. Keyinchalik transfer rasman e’lon qilindi ham. Taniqli insayder Fabritsio Romanoning xabar berishicha, muzokaralarda hal qiluvchi omil bo‘lib, londonliklar bosh murabbiyi Mikel Artetaning shaxsan o‘zi futbolchiga qo‘ng‘iroq qilgani bo‘lgan.
Xo‘sh, kim o‘zi Edegor?
Edegor 15 yoshida Norvegiya chempionatidagi birinchi uchrashuvini o‘tkazgan. Debyut avvalroq bo‘lib o‘tishi ham mumkin edi, ammo liga reglamenti tufayli buning iloji bo‘lmagan. Xuddi shu yoshida u Norvegiya milliy jamoasida o‘ynagan eng yosh futbolchiga aylangan. 16 yoshida esa u Madrid klubiga ushbu yoshdagi futbolchi uchun rekord darajadagi 3 million yevro evaziga ko‘chib o‘tadi va “Real”da ham eng yosh debyutantga aylanadi. Shu tariqa Martin 22 yoshda bo‘lishiga qaramay, “Arsenal”ga ancha tajribali futbolchi sifatida keldi.
“Arsenal” O‘zildan qutulishi bilanoq Edegor transferini amalga oshirdi. Mesut hatto Angliya chempionati qaydnomasiga ham kiritilmagandi. Aftidan, baribir Artetega o‘yin uslubi O‘zilnikiga o‘xshash o‘yinchi kerak.
Aynan hujum bilan “Arsenal” bu mavsumda, ayniqsa mavsum boshida muammolarga duch keldi. Bir yarim oy oldin “Arsenal” gollar soni bo‘yicha ligada 16-o‘rinni egallab turgandi, to‘g‘ri, hozir vaziyat biroz o‘nglandi. Umumiy zarbalar soni bo‘yicha – 11-o‘rin, aniq zarbalar bo‘yicha esa – 13-o‘rin. Va bu natija Obameyang, Lyakazett, Villian, Pepe va boshqa ajoyib hujumchilar to‘plami bilan qayd etilmoqda.
Edegor haqida nimalar deyilmoqda?
TalkSport mutaxassisi Arnold Klark Edegorning “Arsenal”dagi vaziyatni to‘g‘rilashiga va jamoaga O‘zil berishi kerak bo‘lgan narsani bera olishiga ishonmoqda: “Edegor – Mesut O‘zil singari o‘yinchi, pleymeyker, ‘o‘ninchi raqam’. Ehtimol, u Obameyang va Lyakazettni yaxshi paslar bilan ta’minlaydi”.
Norvegiyalik Niderlandiyaning “Vitess”isidagi (ijarada o‘ynagan) statistikasi ham bundan dalolat berishi mumkin: o‘shanda yarim himoyachi 9 ta gol va 12 ta golli uzatmani amalga oshirgandi, har bir o‘yinda o‘rtacha 3,5 ta o‘tkir pas. “Real Sosyedad”dagi navbatdagi ijara oldingisi bilan solishtirilganda biroz yomonroq, ammo buni ham ancha muvaffaqiyatli deb hisoblash mumkin: 4 ta gol, 5 ta assist va har bir uchrashuvda o‘rtacha 2 ta o‘tkir pas.
Umuman olganda, ijaralarda Martin o‘zini juda yorqin namoyish etgan. Edegor bilan “Vitess”da birga ishlagan Oleg Yarovinskiy u haqida quyidagi so‘zlarni aytgandi:
“Martin maydonda hamma narsa qila oladi – tezkor, texnik jihatdan yaxshi ko‘nikmalarga ega va katta hajmdagi ishlarni bajara oladi. Zaif tomonlarsiz va o‘yinni tushunadigan zamonaviy futbolchining ajoyib namunasi. Shu bilan birga u nafaqat toza to‘plarda o‘ynaydi, balki kurash ham olib boradi”.
Ta’riflarga qaraganda, Edegor yetuk futbolchi va o‘yin sifati jihatidan APLga moslashishi kerak, ammo nega unda “Real”da o‘z o‘rniga ega bo‘lmadi? “Vitess”ning o‘sha paytdagi bosh murabbiyi Leonid Slutskiy bu savolga shunday javob berdi:
“Hamma uning to‘pni olib, o‘n kishini aldab o‘tishini va gol urishini kutmoqda. Uning faoliyatidagi har bir kun shunday umidlar bilan o‘tmoqda. Men u dunyoning eng iste’dodli o‘smiri deb tan olingandan beri uni ta’qib qilgan ruhiy yukni undan olib tashladim”.
“Slutskiy menga erkinlik va o‘zimga bo‘lgan ishonchni bag‘ishladi”, – deya tasdiqlaydi futbolchining o‘zi ham yuqoridagi gaplarni.
Norvegiyalik futbolchiga Madridda erkinlik berish kerak edi. “Real”ga kelgan har bir futbolchiga ulkan bosim ositida qolishi tabiiy. Hatto bu bosimga Eden Azar darajasidagi super yulduzlar ham dosh berolmasligi mumkin. Premyer Ligada 9-o‘rinni egallab turgan “Arsenal” esa yosh yigit uchun o‘zini ko‘rsatishga zo‘r maskan bo‘lib ko‘rinmoqda. Hozir ham klub, ham futbolchi bir-biriga muhtoj.
Aftidan, Madriddagilar boshidanoq bu yigitga ishonmagan. Edegor Karlo Anchelotti davrida “qirollik klubi”da paydo bo‘lgandi, mutaxassis o‘zining “Sokin yetakchilik” kitobida ushbu transferni ko‘proq PR (piar) harakat deb atagandi. “Florentino Peres norvegiyalik futbolchini sotib olsa, siz shunchaki buni qabul qilishingiz kerak”, – deb yozgan Anchelotti. Biroq Gvardiolaning Edegorni dunyoning eng yaxshi futbolchisiga aylantirmoqchi bo‘lgani haqida ham ma’lumotlar uchragan.
Edegorning saviyasi “Arsenal”ga to‘g‘ri keladi. Savol shuki, klub bir necha oyga kelgan futbolchiga qanchalik darajada ishonishga tayyor?!
Izoh (0)