O‘zbekistonda koronavirusga chalingan og‘ir ahvoldagi ikki nafar mahkum muddatidan avval ozodlikka chiqarildi

O‘zbekistondagi jazoni ijro etish muassasalarida saqlanayotgan mahbuslarning 9 foizi koronavirus kasalligiga chalingan. Bu haqda 28-yanvar kuni AOKAda bo‘lib o‘tgan matbuot anjumanida IIV Jazoni ijro etish bosh boshqarmasi davolash profilaktika yordamini tashkillashtirish bo‘limi boshlig‘i Bahodir Yusupov ma’lum qildi.

“Albatta, jazoni ijro etish muassasasida ham koronavirus kasalligi qayd etildi. Biz koronavirus infeksiyasiga qarshi davolash me’zonlarini ishlab chiqqan edik. Yengil va simtompsiz shakldagilarni biz tizimning o‘zida, o‘rta va og‘ir shakldagilarini Sog‘liqni saqlash vazirligi tasarrufidagi 4 ta kasalxonada davoladik. Shuni ta’kidlash kerakki, o‘rta hisobda mahbuslarning 9 foizi kasallikka chalingan. Lekin birorta ham o‘lim holati qayd etilmadi”, — dedi Bahodir Yusupov.

Ta’kidlanishicha, sog‘liqni saqlash tizimiga olib chiqib Qashqadaryo hamda Buxoro viloyatida davolanayotgan shaxslar Jinoyat kodeksining 75-moddasi (Kasallik yoki mehnat qobiliyatini yo‘qotish oqibatida jazodan ozod qilish) va jinoiy javobgarlik to‘g‘risidagi kodeksning 165-moddasiga (tovlamachilik) binoan og‘ir ahvoldagi ikki nafar bemor muddatidan oldin ozodlikka chiqarilgan.

Shuningdek, respublikada 2021-yil 1-yanvar holatida probatsiya bo‘limlarida 57 ming 36 nafar shaxs nazorat ostida turibdi. Ulardan 52 ming 73 nafarini erkaklar, 4 ming 963 tasini ayollar, 16 ming 186 nafarini yoshlar, 189 nafarini esa voyaga yetmagan shaxslar tashkil etadi.

“Hozirgi kunda barcha tarbiya koloniyalarida jazoni o‘tayotgan mahkumlar mehnatga jalb qilinmasdan o‘qish bilan band. Xususan, voyaga yetmaganlarning 25 nafariga maxsus haydovchilik guvohnomalari berildi”, — dedi Yusupov.

Bundan tashqari, O‘zbekistonda jazoni o‘tayotganlar uchun bir qator qulayliklar ham yaratilgan bo‘lib, 2021-yilning 1-fevralidan boshlab mahkumlar va ularning yaqinlari uchun onlayn rejimida masofaviy videouchrashuv taqdim etiladi.

“Birinchi marta ozodlikdan mahrum etish jazosiga hukm qilingan shaxslar jazoni yengilrog‘iga almashtirish tartibida to‘g‘ridan to‘g‘ri probatsiya nazoratiga o‘tkaziladi. Buning natijasida, manzil-koloniyalarida jazo muddatini o‘tayotgan mahkumlar sonining tizimli qisqarib borishi hisobiga manzil-koloniyalari soni 25 tagacha qisqartiriladi va maqbullashtiriladi”, – dedi Jazoni ijro etish bosh boshqarmasi Tarbiyaviy va ijtimoiy psixologik ishlarni tashkil etish boshqarmasi boshlig‘i Jamshid Sultonov.

Avvalroq Jazoni ijro etish xodimlari shaxsiy videoregistrator (bodikamera) bilan xizmat o‘tashlari joriy qilinishi va hozirda Zangiota tumanidagi jazoni ijro etish muassasasida test rejimida sinovdan o‘tkazilayotgani haqida xabar qilingan edi.

Ma’lumot uchun, 2021-yil 28-yanvar holatiga ko‘ra, O‘zbekistonda koronavirus infeksiyasi qayd etilganlar soni 78 ming 602 (+46) nafarni tashkil etmoqda. Ayni paytda tibbiyot muassasalarida davolanayotgan 897 nafar bemordan 158 nafari og‘ir, 32 nafari esa o‘ta og‘ir ahvolda deyiladi Sog‘liqni saqlash vazirligi axborotida.

Eslatib o‘tamiz, O‘zbekistonda COVID-19’ga qarshi vaksinatsiya jarayonining dastlabki bosqichida 50 mingga yaqin aholi emlanadi va Moliya vaziri Timur Ishmetov 2021-yilda O‘zbekiston koronavirusga qarshi kurashish tadbirlari va vaksina sotib olish xarajatlari uchun 3 trillion so‘m ajratishini bildirgan.