Norvegiya hukumati 29-yanvardan boshlab mamlakat hududiga kirishni yopib qo‘ydi, asoslangan sabablari bor kishilargagina istisno tarzida ruxsat berilishi mumkin. Bu haqda mamlakat bosh vaziri Erna Sulberga ma’lum qilgan, deb yozmoqda “Izvestiya”.
“Amalda chegaralar Norvegiyada yashamaydigan hamma uchun yopiladi”, — degan hukumat rahbari.
Bosh vazirning so‘zlariga ko‘ra, xizmatlar va mahsulotlar juda muhim, ularning Norvegiyaga olib kelinishi davom etadi, yangi qoidalarga ko‘ra kelasi haftadan boshlab mehnat muhojirlari Norvegiya hududiga kira olmaydi. Ushbu cheklov ikki hafta muddatdan keyin qayta ko‘rib chiqiladi.
Pandemiya boshlanganidan buyon Norvegiyada 62 mingdan ziyod odam koronavirus infeksiyasini yuqtirib olgan, 557 nafar bemor kasallik asoratlari oqibatida vafot etgan.
24-yanvarda Shvetsiya hukumati Osloda koronavirusning Britaniya shtammi paydo bo‘lgani tufayli Norvegiyaga borishni taqiqlab qo‘ygandi. Cheklov kamida 14-fevralga qadar amal qiladi.
Norvegiyada yanvar boshida koronavirus sabab joriy etilgan cheklovlar yanada kuchaytirilgandi. Keyinchalik mamlakatda koronavirusga qarshi Pfizer vaksinasi bilan emlangan ikki kishi vafot etgani xabar qilindi, oradan bir haftadan oshiq vaqt o‘tgach Pfizer vaksinasi bilan emlanganidan keyin vafot etganlar soni 23 nafarga yetdi.
Izoh (0)