“Toshkent savdo markazi” (sobiq “GUM”) onlayn-auksion orqali 242,8 milliard so‘mga sotildi. Bu haqda Davlat aktivlarini boshqarish agentligi matbuot xizmatiga tayanib Spot xabar berdi.
Mazkur lot 2020-yilning mayida sotuvga qo‘yilgan. Biroq arizalar yo‘qligi sabab yozda uning narxi 30 milliard so‘mga arzonlashtirilgan — 273,1 milliard so‘mga.
Ma’lum qilinishicha, ushbu lot xarid qilish bo‘yicha yagona arizani faqatgina bitta ishtirokchi – Buyuk Eco Savdo MChJ topshirgan. Kompaniya 2019-yilda xalq xo‘jaligi mahsulotlari va arralangan bino materiallarini import qilish maqsadida tuzilgan.
“Toshkent savdo markazi” O‘zbekistondagi onlayn-auksion maydonchasi faoliyati tarixidagi eng yirik va qimmat lotlardan biri hisoblanadi. Savdo markazi 3,9 gektar hududda joylashgan bo‘lib, binolar egallagan maydon 40,7 ming kvadrat metrni tashkil etadi. Bino avvaliga “Davlat universal magazini” sifatida qurilgan. 2000-yildan 2011-yilga qadar u yerda Turkuaz do‘koni joylashgan edi.
Ma’lumot uchun, 2019-yilning yanvarida 13 milliard so‘m qiymatida sotuvga qo‘yilgan Shakhrisabz Star mehmonxonasi “Asdbek—Kesh” MChJga 6,6 milliard so‘mga sotilgan edi. Kompaniya auksionning yagona ishtirokchisi bo‘lgani sabab savdolar 10 daqiqa davom etgan.
Bundan tashqari, 2020-yilning yozida Diamond Drinks Co MChJ 35,3 milliard so‘mga poytaxtdagi Versal restoraniga egalik huquqini qo‘lga kiritgandi. “Chorsu” mehmonxonasi esa 2020-yilning boshida 16,9 milliard so‘mga, Afrosiyob Palace — 43,3 milliard so‘mga sotilgan edi.
Izoh (0)