«Тошкент савдо маркази» 242,8 млрд сўмга сотилди

«Тошкент савдо маркази» (собиқ «ГУМ») онлайн-аукцион орқали 242,8 миллиард сўмга сотилди. Бу ҳақда Давлат активларини бошқариш агентлиги матбуот хизматига таяниб Spot хабар берди.

Мазкур лот 2020 йилнинг майида сотувга қўйилган. Бироқ аризалар йўқлиги сабаб ёзда унинг нархи 30 миллиард сўмга арзонлаштирилган — 273,1 миллиард сўмга.

Маълум қилинишича, ушбу лот харид қилиш бўйича ягона аризани фақатгина битта иштирокчи – Buyuk Eco Savdo МЧЖ топширган. Компания 2019 йилда халқ хўжалиги маҳсулотлари ва арраланган бино материалларини импорт қилиш мақсадида тузилган.

«Тошкент савдо маркази» Ўзбекистондаги онлайн-аукцион майдончаси фаолияти тарихидаги энг йирик ва қиммат лотлардан бири ҳисобланади. Савдо маркази 3,9 гектар ҳудудда жойлашган бўлиб, бинолар эгаллаган майдон 40,7 минг квадрат метрни ташкил этади. Бино аввалига «Давлат универсал магазини» сифатида қурилган. 2000 йилдан 2011 йилга қадар у ерда Turkuaz дўкони жойлашган эди.

Маълумот учун, 2019 йилнинг январида 13 миллиард сўм қийматида сотувга қўйилган Shakhrisabz Star меҳмонхонаси «Асдбек—Кеш» МЧЖга 6,6 миллиард сўмга сотилган эди. Компания аукционнинг ягона иштирокчиси бўлгани сабаб савдолар 10 дақиқа давом этган.

Бундан ташқари, 2020 йилнинг ёзида Diamond Drinks Co МЧЖ 35,3 миллиард сўмга пойтахтдаги Versal ресторанига эгалик ҳуқуқини қўлга киритганди. «Чорсу» меҳмонхонаси эса 2020 йилнинг бошида 16,9 миллиард сўмга, Аfrosiyob Palace — 43,3 миллиард сўмга сотилган эди.