Sirdaryo viloyati Shirin shahar YPX postidan o‘tayotgan fuqarolarda aniqlangan qalbaki pullar yo‘q qilindi, deya xabar bermoqda Majburiy ijro byurosiga tayanib “Kun.uz”.
Ma’lum qilinishicha, 2020-yilning 1-oktabr kuni T.Sh. o‘zining jinoiy sherigi K.X. hamda Qirg‘iziston fuqarosi bo‘lgan Hoji ismli shaxs bilan o‘zaro jinoiy til biriktirib, Farg‘ona shahrida Hojining Ja’far ismli tanishidan 8 ming AQSh dollari evaziga jami 20 ming dollar miqdoridagi qalbaki pullarni sotib olgan.
Majburiy ijro byurosi xabariga ko‘ra, ular Toshkent viloyatidan Sirdaryo viloyati tomon harakatlanib ketayotgan vaqtida Bosh prokuratura huzuridagi departamentning Sirdaryo viloyat boshqarmasi va DXX Sirdaryo viloyat boshqarmasi xodimlari tomonidan Shirin shahar YPX postida ushlangan va 20 ming dollar miqdoridagi qalbaki pullar daliliy ashyo sifatida olingan.
Mazkur holat yuzasidan Jinoyat ishlari bo‘yicha Sardoba tuman sudi tomonidan jinoyat ishi qo‘zg‘atilgan.
Jinoyat kodeksining 25,176-moddasi 3-qismi “a” bandi (juda ko‘p miqdorda qalbaki pul yasash yoki o‘tkazish) bilan sudlangan K.X. va boshqalarning jinoyat ishi bo‘yicha daliliy ashyo sifatida olingan qalbaki 20 ming dollarni tegishli tartibda yo‘q qilish to‘g‘risida sud qaror chiqargan.
Tuman MIB tomonidan bu vazifa 2021-yilning 28-yanvar kuni amalga oshirilgan.
Avvalroq Shayxontohurda qalbaki 50 ming so‘mlik kupyuralarni ishlab chiqarish bilan shug‘ullangan xonadon faoliyati fosh etilgani, Surxondaryoda qalbaki pullar tayyorlagan shaxs qo‘lga olingani hamda Namanganda 50 ming va 100 ming so‘mlik kupyuralarni qalbakilashtirganlar ushlangani haqida xabar berilgandi.
Izoh (0)