Сирдарё вилояти Ширин шаҳар ЙПХ постидан ўтаётган фуқароларда аниқланган қалбаки пуллар йўқ қилинди, дея хабар бермоқда Мажбурий ижро бюросига таяниб «Kun.uz».
Маълум қилинишича, 2020 йилнинг 1 октябрь куни Т.Ш. ўзининг жиноий шериги К.Х. ҳамда Қирғизистон фуқароси бўлган Ҳожи исмли шахс билан ўзаро жиноий тил бириктириб, Фарғона шаҳрида Ҳожининг Жаъфар исмли танишидан 8 минг АҚШ доллари эвазига жами 20 минг доллар миқдоридаги қалбаки пулларни сотиб олган.
Мажбурий ижро бюроси хабарига кўра, улар Тошкент вилоятидан Сирдарё вилояти томон ҳаракатланиб кетаётган вақтида Бош прокуратура ҳузуридаги департаментнинг Сирдарё вилоят бошқармаси ва ДХХ Сирдарё вилоят бошқармаси ходимлари томонидан Ширин шаҳар ЙПХ постида ушланган ва 20 минг доллар миқдоридаги қалбаки пуллар далилий ашё сифатида олинган.
Мазкур ҳолат юзасидан Жиноят ишлари бўйича Сардоба туман суди томонидан жиноят иши қўзғатилган.
Жиноят кодексининг 25,176-моддаси 3-қисми «а» банди (жуда кўп миқдорда қалбаки пул ясаш ёки ўтказиш) билан судланган К.Х. ва бошқаларнинг жиноят иши бўйича далилий ашё сифатида олинган қалбаки 20 минг долларни тегишли тартибда йўқ қилиш тўғрисида суд қарор чиқарган.
Туман МИБ томонидан бу вазифа 2021 йилнинг 28 январь куни амалга оширилган.
Аввалроқ Шайхонтоҳурда қалбаки 50 минг сўмлик купюраларни ишлаб чиқариш билан шуғулланган хонадон фаолияти фош этилгани, Сурхондарёда қалбаки пуллар тайёрлаган шахс қўлга олингани ҳамда Наманганда 50 минг ва 100 минг сўмлик купюраларни қалбакилаштирганлар ушлангани ҳақида хабар берилганди.
Изоҳ (0)