Ijtimoiy tarmoqda 2021-yilning 28-yanvar kuni “Shahrisabzda GAI xodimi odam urib yubordi” sarlavhasi ostidagi video lavha tarqalgan. YHXBB holat yuzasidan ma’lumot berdi.
Ma’lum qilinishicha, videolavha o‘rganilganda 2021-yilning 27-yanvar kuni belgilangan taqsimot asosida Qashqadaryo viloyati Shahrisabz tumani Chorshanbe qo‘rg‘onchasi hududida tuman IIB YHXB xodimlari E.Qo‘ziyev va M.Doniyorovlar xizmati davomida avtomobil yo‘lida o‘rnatilgan 3.27. (to‘xtash taqiqlangan) yo‘l belgisi ta’sir doirasida to‘xtab turgan bir-necha haydovchilar boshqaruvidagi transport vositalarini planshet yordamida suratga olib, qoidabuzarlik uchun tegishli tartibda chora ko‘rgan.Ushbu avtomobillar haydovchilari ko‘rilgan choraga e’tiroz bildirib, bu atrofdagi boshqa haydovchilar ham to‘planishiga olib kelgan.
Fuqarolar tomonidan olingan videotasvirga “Shahrisabzda GAI xodimi odam urib yubordi” sarlavhasi noto‘g‘ri berilib, norasmiy sahifalarda asossiz tarqatilgan.
Ta’kidlanishicha, Shahrisabz tuman IIB YHXB xodimlari E.Qo‘ziyev va M.Doniyorovlarning qonuniy talablarini bajarmagani va xizmat faoliyatiga xalaqit bergani bois fuqarolar – 1976-yilda tug‘ilgan N.M., 1995-yilda tug‘ilgan B.T. hamda 1993-yilda tug‘ilgan B.B.ga nisbatan to‘plangan hujjatlar ko‘rib chiqishlik uchun Jinoyat ishlari bo‘yicha Shahrisabz tuman sudiga yuborildi.
2021-yilning 28-yanvar kuni sud tomonidan:
- fuqaro, 1976-yilda tug‘ilgan N.M. Ma’muriy javobgarlik to‘g‘risidagi kodeksning 183-moddasi (mayda bezorilik), 194-moddasi 1-qismi (ichki ishlar organlari xodimining qonuniy talablarini bajarmaslik) va 195-moddasida (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) ko‘rsatilgan huquqbuzarliklarni sodir etgan deya topilib, 10 sutka ma’muriy qamoq jazosi;
- fuqaro, 1995-yilda tug‘ilgan B.T. Ma’muriy javobgarlik to‘g‘risidagi kodeksning 194-moddasi 1-qismi va 195-moddasida ko‘rsatilgan huquqbuzarliklarni sodir etgan deya topilib, 7 sutka ma’muriy qamoq jazosi;
- fuqaro, 1993-yilda tug‘ilgan B.B. Ma’muriy javobgarlik to‘g‘risidagi kodeksning 194-moddasi 1-qismida ko‘rsatilgan huquqbuzarlikni sodir etgan deya topilib, bazaviy hisoblash miqdorining 2 baravari miqdorida, ya’ni, 446 000 so‘m jarima jazosi tayinlandi.
Izoh (0)