Tesla va SpaceX asoschisi Ilon Mask ilk bor 2012-yilda ishlab chiqarilgan Plaid S avtomobilining yangilangan modelini taqdim etdi. Maskning va’da qilishicha, yangi modelni shu yilning fevral oyidan boshlab xarid qilish mumkin bo‘ladi. Bu haqda biznesmen o‘zining Twitter’dagi sahifasiga yozib qoldirgan.
“Bu soatiga 60 mil (deyarli 100 kilometr) tezlikka 2 soniyadan kamroq vaqt ichida erisha oladigan shu kunga qadar ishlab chiqarilgan dunyodagi birinchi avtomobil hisoblanadi. Yangilangan Tesla S’ning Plaid va Plaid+ versiyalarining maksimal tezligi ‘to‘g‘ri shinalar’ yordamida 332 km/soatni tashkil etadi”, — deb yozadi Mask.
Kompaniya saytida qayd etilishicha, yangi modelning ruli shturval shaklida ishlangan, old panel markazida joylashgan kengaytirilgan displeyning piksellari soni 2200x1300 ni tashkil etadi. Maskning ta’kidlashicha, bu shunchaki displey emas, balki Cyberpunk 77 o‘ynash mumkin bo‘lgan yuqori samaradorlikka ega haqiqiy kompyuter.
Bundan tashqari, modelning orqa o‘rindiqlari butkul yangilanib, oyoqlarni uzatish uchun qo‘shimcha joy hamda simsiz quvvatlantirish imkoniyati paydo bo‘lgan. Eksteryerning asosiy yangilanishi — panorama tom.
Maskning posti ostiga Stiven King izoh qoldirgan bo‘lib, u yangi modelni xarid qilish istagini bildirgan. “Menda ushbu mashina bo‘lishini xohlayman”, — deb yozadi King.
Shuningdek, kompaniya yangilangan X modelini ham taqdim etgan. The Verge’ning yozishicha, avtomobil dizayni jiddiy o‘zgarmagan, biroq versiya yangilangan qurilmalar paneli, shturval shaklidagi yangi rul va orqa o‘rindiqdagi yo‘lovchilar uchun displeylarga ega bo‘lgan.
Long Range versiyasidagi ikki motorli Model S’ni 79,9 ming dollarga xarid qilish mumkin. Ushbu model bir marta quvvatlanish orqali 677 kilometr yo‘l bosishga qodir. Bir marta quvvatlanishda 837 kilometr yurishga qodir uch motorli Plaid va Plaid + narxi esa mos ravishda 119,9 ming va 139,9 ming dollarni tashkil etadi.
Izoh (0)