Шаҳрисабзда ЙПХ ходими одам уриб юборгани ҳақидаги хабар асоссиз экани айтилиб, воқеа иштирокчилари ҳибсга олингани маълум қилинди

Ижтимоий тармоқда 2021 йилнинг 28 январь куни «Шаҳрисабзда ГАИ ходими одам уриб юборди» сарлавҳаси остидаги видео лавҳа тарқалган. ЙҲХББ ҳолат юзасидан маълумот берди.

Маълум қилинишича, видеолавҳа ўрганилганда 2021 йилнинг 27 январь куни белгиланган тақсимот асосида Қашқадарё вилояти Шаҳрисабз тумани Чоршанбе қўрғончаси ҳудудида туман ИИБ ЙҲХБ ходимлари Э.Қўзиев ва М.Дониёровлар хизмати давомида автомобиль йўлида ўрнатилган 3.27. (тўхташ тақиқланган) йўл белгиси таъсир доирасида тўхтаб турган бир-неча ҳайдовчилар бошқарувидаги транспорт воситаларини планшет ёрдамида суратга олиб, қоидабузарлик учун тегишли тартибда чора кўрган.Ушбу автомобиллар ҳайдовчилари кўрилган чорага эътироз билдириб, бу атрофдаги бошқа ҳайдовчилар ҳам тўпланишига олиб келган.

Фуқаролар томонидан олинган видеотасвирга «Шаҳрисабзда ГАИ ходими одам уриб юборди» сарлавҳаси нотўғри берилиб, норасмий саҳифаларда асоссиз тарқатилган.

Таъкидланишича, Шаҳрисабз туман ИИБ ЙҲХБ ходимлари Э.Қўзиев ва М.Дониёровларнинг қонуний талабларини бажармагани ва хизмат фаолиятига халақит бергани боис фуқаролар – 1976 йилда туғилган Н.М., 1995 йилда туғилган Б.Т. ҳамда 1993 йилда туғилган Б.Б.га нисбатан тўпланган ҳужжатлар кўриб чиқишлик учун Жиноят ишлари бўйича Шаҳрисабз туман судига юборилди.

2021 йилнинг 28 январь куни суд томонидан:

• фуқаро, 1976 йилда туғилган Н.М. Маъмурий жавобгарлик тўғрисидаги кодекснинг 183-моддаси (майда безорилик), 194-моддаси 1-қисми (ички ишлар органлари ходимининг қонуний талабларини бажармаслик) ва 195-моддасида (ички ишлар органлари ходимларининг ўз хизмат бурчларини бажаришларига қаршилик кўрсатиш) кўрсатилган ҳуқуқбузарликларни содир этган дея топилиб, 10 сутка маъмурий қамоқ жазоси;
• фуқаро, 1995 йилда туғилган Б.Т. Маъмурий жавобгарлик тўғрисидаги кодекснинг 194-моддаси 1-қисми ва 195-моддасида кўрсатилган ҳуқуқбузарликларни содир этган дея топилиб, 7 сутка маъмурий қамоқ жазоси;
• фуқаро, 1993 йилда туғилган Б.Б. Маъмурий жавобгарлик тўғрисидаги кодекснинг 194-моддаси 1-қисмида кўрсатилган ҳуқуқбузарликни содир этган дея топилиб, базавий ҳисоблаш миқдорининг 2 баравари миқдорида, яъни, 446 000 сўм жарима жазоси тайинланди.