YouTube’dagi 3D Sanago kanalida Porsche Taycan’ning uch o‘lchamli o‘yinchoq nusxasini 3D-ruchka va oddiy asbob-anjomlar yordamida yaratish jarayoni tasvirlangan video paydo bo‘ldi.
Koreyalik bloger additiv texnologiyalar va radioboshqaruv tizimidan foydalangan holda ishlaydigan “podveska”ga ega elektrokarning juda o‘xshash nusxasini yaratishga muvaffaq bo‘lgan.
Bloger Porsche Taycan nusxasini yaratish uchun qog‘ozga bo‘lajak model kuzovini chizgan. 3D-ruchka va chop etiladigan plastik yordamida video muallifi elektrosportkarning tashqi ramkasini chizgan. Shundan so‘ng erkak kuzovdagi bo‘sh joylarni aynan shu material yordamida to‘ldirgan. O‘yinchoq nusxaning yuzalarini silliqlash uchun oddiy shpaklyovka, jilo mashinkasi va qumqog‘ozdan foydalanilgan. Natijada usta haqiqiy Taycan’ning juda o‘xshash nusxasini yaratishga erishgan.
Keyingi bosqichda bloger sportkarni yashil rangga bo‘yagan, unga asosiy optika va orqa fonarlar sifatida foydalanilgan mitti yorug‘lik diodlarini o‘rnatgan. Bundan tashqari, mutaxassis ancha mayda detallarni alohida “chop etgan” — bamper, old splitter, shuningdek, oyna va faralar blokini plastikdan qirqib olgan. Yakunda rolik muallifi sportkarning uch o‘lchamli nusxasiga radioboshqariluvchi g‘ildiraklarni o‘rnatgan.
Loyiha muallifining so‘zlariga ko‘ra, bu kabi uch o‘lchamli sportkarni yasash uchun bir oyga yaqin vaqt ketgan.
Izoh (0)