Tesla ва SpaceX асосчиси Илон Маск илк бор 2012 йилда ишлаб чиқарилган Plaid S автомобилининг янгиланган моделини тақдим этди. Маскнинг ваъда қилишича, янги моделни шу йилнинг февраль ойидан бошлаб харид қилиш мумкин бўлади. Бу ҳақда бизнесмен ўзининг Twitter’даги саҳифасига ёзиб қолдирган.
«Бу соатига 60 мил (деярли 100 километр) тезликка 2 сониядан камроқ вақт ичида эриша оладиган шу кунга қадар ишлаб чиқарилган дунёдаги биринчи автомобиль ҳисобланади. Янгиланган Tesla S’нинг Plaid ва Plaid+ версияларининг максимал тезлиги ‘тўғри шиналар’ ёрдамида 332 км/соатни ташкил этади», — деб ёзади Маск.
Компания сайтида қайд этилишича, янги моделнинг рули штурвал шаклида ишланган, олд панел марказида жойлашган кенгайтирилган дисплейнинг пикселлари сони 2200х1300 ни ташкил этади. Маскнинг таъкидлашича, бу шунчаки дисплей эмас, балки Cyberpunk 77 ўйнаш мумкин бўлган юқори самарадорликка эга ҳақиқий компьютер.
Бундан ташқари, моделнинг орқа ўриндиқлари буткул янгиланиб, оёқларни узатиш учун қўшимча жой ҳамда симсиз қувватлантириш имконияти пайдо бўлган. Экстерернинг асосий янгиланиши — панорама том.
Маскнинг пости остига Стивен Кинг изоҳ қолдирган бўлиб, у янги моделни харид қилиш истагини билдирган. «Менда ушбу машина бўлишини хоҳлайман», — деб ёзади Кинг.
Шунингдек, компания янгиланган Х моделини ҳам тақдим этган. The Verge’нинг ёзишича, автомобиль дизайни жиддий ўзгармаган, бироқ версия янгиланган қурилмалар панели, штурвал шаклидаги янги руль ва орқа ўриндиқдаги йўловчилар учун дисплейларга эга бўлган.
Long Range версиясидаги икки моторли Model S’ни 79,9 минг долларга харид қилиш мумкин. Ушбу модель бир марта қувватланиш орқали 677 километр йўл босишга қодир. Бир марта қувватланишда 837 километр юришга қодир уч моторли Plaid ва Plaid+ нархи эса мос равишда 119,9 минг ва 139,9 минг долларни ташкил этади.
Изоҳ (0)