Видео: 3D-ручка ёрдамида Porsche Taycan’нинг уч ўлчамли пластик нусхасини яратиш жараёни

YouTube’даги 3D Sanago каналида Porsche Taycan’нинг уч ўлчамли ўйинчоқ нусхасини 3D-ручка ва оддий асбоб-анжомлар ёрдамида яратиш жараёни тасвирланган видео пайдо бўлди.

Кореялик блогер аддитив технологиялар ва радиобошқарув тизимидан фойдаланган ҳолда ишлайдиган «подвеска»га эга электрокарнинг жуда ўхшаш нусхасини яратишга муваффақ бўлган.

Блогер Porsche Taycan нусхасини яратиш учун қоғозга бўлажак модель кузовини чизган. 3D-ручка ва чоп этиладиган пластик ёрдамида видео муаллифи электроспорткарнинг ташқи рамкасини чизган. Шундан сўнг эркак кузовдаги бўш жойларни айнан шу материал ёрдамида тўлдирган. Ўйинчоқ нусханинг юзаларини силлиқлаш учун оддий шпаклёвка, жило машинкаси ва қумқоғоздан фойдаланилган. Натижада уста ҳақиқий Taycan’нинг жуда ўхшаш нусхасини яратишга эришган.

Кейинги босқичда блогер спорткарни яшил рангга бўяган, унга асосий оптика ва орқа фонарлар сифатида фойдаланилган митти ёруғлик диодларини ўрнатган. Бундан ташқари, мутахассис анча майда деталларни алоҳида «чоп этган» — бампер, олд сплиттер, шунингдек, ойна ва фаралар блокини пластикдан қирқиб олган. Якунда ролик муаллифи спорткарнинг уч ўлчамли нусхасига радиобошқарилувчи ғилдиракларни ўрнатган.

Лойиҳа муаллифининг сўзларига кўра, бу каби уч ўлчамли спорткарни ясаш учун бир ойга яқин вақт кетган.