Toshkentda 2020-yilda 100 dan ortiq ko‘p qavatli binolar noqonuniy qurilgan

Toshkentda 2020-yilda 100 dan ortiq ko‘p qavatli binolar noqonuniy qurilgan. Bu haqda Toshkent shahri bosh arxitektori Nuriddin Sagatov 28-yanvar kuni o‘tkazilgan brifingda ma’lum qildi.

Uning aytishicha, poytaxtda yakka tartibdagi uy-joy qurish uchun ajratilgan yer uchastkalarida ko‘p kvartirali uy-joylar qurish holatlari ortib bormoqda.  Oqibatda qurilgan ko‘p kvartirali uylardagi muhandislik kommunikatsiyalari tizimga salbiy ta’sir o‘tkazib, ayrimlarining quvvati yetmay, ayrimlarida esa turli xil avariya holatlari kelib chiqmoqda.

“2020-yilda xatlov o‘tkazilganda 100 dan ortiq yakka tartibdagi uy-joy qurish uchun ajratilgan yer uchastkalarida yakka tartibda uy-joy qurmasdan, uch va undan ortiq qavatli (ko‘p kvartirali) uy-joylar qurilgani aniqlangan. Buning oqibatida shu uylar atrofidagi aholining noroziligi, kommunal sohadagi muammolar ortib bormoqda”, — degan u.

Qayd etilishicha, yangi tahrirdagi Shaharsozlik kodeksida yakka tartibdagi uy-joy qurish uchun ajratilgan yer uchastkalarida ikki va undan ortiq bo‘lgan ko‘p kvartirali uylarni qurish taqiqlandi.

Avvalroq Jizzaxda aslida uch qavatli bo‘lishi kerak bo‘lgan bino loyiha-smeta hujjatlariga o‘zgartirish kiritish orqali olti qavatliga o‘zgartirilgan binoning biq qismi qulagani, uning omon qolgan qismi ham buzib tashlangani xabar berilgan edi. Holat yuzasidan jinoyat ishi qo‘zg‘atilgan.

Samarqandda esa aholi ko‘chib o‘tgan 9 qavatli uyning 2 ta qavati buzib tashlanishi ma’lum qilingandi.