O‘zbekistondagi viloyat hokimlari 2021-yilning yanvar oyi o‘rtalarida bosqichma-bosqich qisqa muddatli ta’tilga chiqishni boshlagani to‘g‘risida xabar berilgandi. Bloger Davletovuz’ning yozishicha, ta’tillar uchun ketadigan xarajatlar davlat budjeti hisobidan qoplangan.
Tumanlar hokimlarining ijtimoiy tarmoqlarda tarqalgan qarorlarining suratlariga ko‘ra, hokimlarning sanatoriylarda davolanishi uchun mablag‘lar tuman mahalliy budjetining 2021-yil zaxira jamg‘armasi mablag‘lari hisobidan ajratilmoqda.
Ta’kidlanishicha, har bir rahbarning ta’tili uchun 7 million so‘m atrofida mablag‘ sarflangan.
Masalan, Uychi tumani hokimining “Chinobod Plaza” sanatoriysida davolanishiga 7,3 million ajratilgan. Shuningdek, bu kabi yo‘llanmadan birini Uchquduq tumani hokimligi, yana to‘rttasini Qoraqalpog‘iston Respublikasi Vazirlar Kengashi ham olgan.
Eslatib o‘tamiz, Prezident Shavkat Mirziyoyev ham 2021-yil 4-yanvardan qisqa muddatli mehnat ta’tiliga chiqib,11-yanvarda ta’tildan qaytgandi.
Ma’lumot uchun, O‘zbekistondagi amaldagi qonunchilikka ko‘ra viloyat hokimlari hukumat qoshidagi tibbiyot bosh boshqarmasi ro‘yxatida turadi. Ularga zarur holatlarda tibbiy diagnostika qilish, davolash, umuman olganda, ularning salomatligini muhofaza qilish mazkur boshqarma zimmasida.
Izoh (0)