Тошкентда 2020 йилда 100 дан ортиқ кўп қаватли бинолар ноқонуний қурилган. Бу ҳақда Тошкент шаҳри бош архитектори Нуриддин Сагатов 28 январь куни ўтказилган брифингда маълум қилди.
Унинг айтишича, пойтахтда якка тартибдаги уй-жой қуриш учун ажратилган ер участкаларида кўп квартирали уй-жойлар қуриш ҳолатлари ортиб бормоқда. Оқибатда қурилган кўп квартирали уйлардаги муҳандислик коммуникациялари тизимга салбий таъсир ўтказиб, айримларининг қуввати етмай, айримларида эса турли хил авария ҳолатлари келиб чиқмоқда.
«2020 йилда хатлов ўтказилганда 100 дан ортиқ якка тартибдаги уй-жой қуриш учун ажратилган ер участкаларида якка тартибда уй-жой қурмасдан, уч ва ундан ортиқ қаватли (кўп квартирали) уй-жойлар қурилгани аниқланган. Бунинг оқибатида шу уйлар атрофидаги аҳолининг норозилиги, коммунал соҳадаги муаммолар ортиб бормоқда», — деган у.
Қайд этилишича, янги таҳрирдаги Шаҳарсозлик кодексида якка тартибдаги уй-жой қуриш учун ажратилган ер участкаларида икки ва ундан ортиқ бўлган кўп квартирали уйларни қуриш тақиқланди.
Изоҳ (0)