Transparency International korrupsiyaga qarshi kurashish xalqaro nodavlat tashkiloti 2020-yil yakunlari bo‘yicha hisobotini e’lon qildi.
Reytingda O‘zbekiston o‘z o‘rnini 7 pog‘onaga yaxshilab, 180 ta davlat orasida 146-o‘rinni egalladi. 2019-yilda mamlakat 153-o‘rinda edi, 2018-yilda 158-o‘rinni, 2017-yilda 157 o‘rinni, 2016-yilda esa 156-o‘rinni egallagan.
Korrupsiyani qabul qilish indeksi davlat sektorida korrupsiya darajasini aks ettirib, u 100 balli shkalada baholanadi. 0 ball korrupsiyaning yuqori darajasini, 100 ball esa aksincha, eng past darajani bildiradi. Baholashda qator manbalardan, shu jumladan, ekspertlar baholari va ishbilarmon doiralar vakillari o‘rtasida o‘tkazilgan so‘rovnomalardan foydalaniladi.
Tadqiqot mualliflarining ta’kidlashicha, COVID-19 pandemiyasi korrupsiyalashgan va avtoritar rahbarlar uchun hukumat xarajatlari ustidan nazoratni susaytirish va fuqarolar erkinligini cheklash uchun bahona bo‘ldi.
Reytingda korrupsiya darajasi pastligi bo‘yicha birinchi o‘rinni 88 ball bilan Yangi Zelandiya va Daniya egallagan. Undan keyingi pog‘onalarda 85 ball bilan Shveysariya , Singapur va Shvetsiya joy olgan.
Eng yomon ko‘rsatkich 12 ball to‘plagan Janubiy Sudan va Somalida qayd etilgan.
Markaziy Osiyo davlatlari orasida korrupsiya darajasi kamligi bo‘yicha Qozog‘iston 38 ball bilan birinchi o‘rinda. Undan keyingi o‘rinlarni Qirg‘iziston (31 ball), O‘zbekiston (26 ball), Tojikiston (25 ball) va Turkmaniston (19 ball) egallagan.
Eslatib o‘tamiz, 2019-yilda Transparency International korrupsiyaga qarshi kurashish samaradorligini oshirish sohasida O‘zbekistonga ko‘mak berishga tayyorligini bildirgandi.
Shavkat Mirziyoyev korrupsiyaga qarshi kurashning yangi tuzilmalarini tashkil qilish bo‘yicha 2020-yilda o‘tkazgan yig‘ilishda O‘zbekiston Transparency International indeksida oxirgi uch yilda 12 pog‘onaga ko‘tarilgan bo‘lsa-da, hali bu illat barham topmaganini ta’kidlagan edi. Prezident 2020-yil 29-dekabr kuni Oliy Majlisga yo‘llagan Murojaatnomasida “Korrupsiyaga toqatsizlik hayotimiz bir qismiga aylanishi kerak”, deb aytgandi. Davlat rahbari 2021-yil 27-yanvar kuni o‘tkazgan yig‘ilishda bosh prokurorga hududlarga korrupsiya bo‘yicha “tashxis qo‘yish” topshirig‘ini berdi.
Transparency International — korrupsiyaga qarshi kurash va butun dunyodagi korrupsiya darajasini o‘rganish bo‘yicha nodavlat xalqaro tashkilotdir. Xalqaro harakat 1993-yilda Jahon bankining sobiq direktori Peter Aygen tomonidan Berlinda tashkil etilgan. Hozirgi kunda tashkilot dunyoning 100 dan ortiq mamlakatida o‘z bo‘limlariga ega.
Izoh (0)