AQSh Kongressi Senati 27-yanvar kuni Prezident Jozef Bayden tomonidan ilgari surilgan Davlat departamenti rahbari lavozimiga Entoni Blinken nomzodini ma’qulladi. Ovoz berish Amerika qonun chiqaruvchi organining yuqori palatasi veb-saytida translyatsiya qilindi. Bu haqda “TASS” xabar qildi.
78 senator nomzodni qo‘llab-quvvatladi, 22 qonun chiqaruvchi qarshi chiqdi. Yaqin kelajakda 58 yoshli Blinken qasamyod qabul qiladi.
Blinken 1962-yil 16-aprelda Nyu-Yorkda yahudiy oilasida tug‘ilgan. Uning ota tomondan ajdodlari Rossiyadan AQShga ko‘chib kelgan.
Qo‘shma shtatlarning 42-prezidenti Bill Klinton ma’muriyati davrida Blinken Oq uyda Milliy xavfsizlik kengashi xodimi sifatida ishlagan. U prezidentning tashqi siyosat bo‘yicha maxsus yordamchisi, Yevropa ishlari bo‘yicha katta direktori hamda strategik rejalashtirish bo‘yicha yordamchisi bo‘lgan. 2002–2008-yillarda bo‘lajak davlat kotibi Senatning tashqi ishlar qo‘mitasining Demokratik fraksiyasi apparatini boshqargan. Ushbu davrda qo‘mita raisi amaldagi davlat rahbari bo‘lgan, uning tarkibiga keyinchalik AQShning 44-prezidenti bo‘lgan Barak Obama ham kiritilgan.
Obama 2009-yilda Amerika yetakchisiga aylanganda va Bayden vitse-prezident lavozimini egallaganida, Blinken birinchi bo‘lib milliy xavfsizlik bo‘yicha vitse-prezident yordamchisi lavozimiga ko‘tarilgan.
2013-yilda u davlat rahbarining milliy xavfsizlik bo‘yicha yordamchisining o‘rinbosari bo‘ldi. Shunda Bayden uni quyidagicha ta’riflagandi: “Blinken har qanday ishni ham uddalay oladi. Toni Blinken – super yulduz va bu mubolag‘a emas. Prezident buni to‘rt yil men bilan birga ishlaganidan keyin tan oldi va uni mendan tortib oldi”.
Blinken 2015–2017-yillarda o‘sha vaqtdagi davlat kotibi Jon Kerrining o‘rinbosari bo‘lgan. 2020-yilgi prezidentlik kampaniyasi paytida Blinken Baydenning saylovoldi shtabining bir qismi – xalqaro masalalar bo‘yicha maslahatchisi bo‘lgan.
Eslatib o‘tamiz, 2018-yilda Reks Tillerson AQSh davlat kotibi lavozimidan bo‘shatilgan va Trampning tavsiyasiga ko‘ra, MRB direktori Mayk Pompeo ushbu lavozimni egallagan.
Avvalroq AQSh moliya vaziri lavozimi birinchi marta ayol kishiga topshirilgani, Pentagon rahbari etib Lloyd Ostin tasdiqlangani va u ushbu lavozimni egallagan birinchi afroamerikalik bo‘lgani hamda AQSh Milliy razvedkasi direktori lavozimini birinchi marta ayol kishi egallagani haqida xabar berilgandi.
Izoh (0)