АҚШнинг янги давлат котиби этиб Энтони Блинкен тасдиқланди

АҚШ Конгресси Сенати 27 январь куни Президент Жозеф Байден томонидан илгари сурилган Давлат департаменти раҳбари лавозимига Энтони Блинкен номзодини маъқуллади. Овоз бериш Америка қонун чиқарувчи органининг юқори палатаси веб-сайтида трансляция қилинди. Бу ҳақда «ТАСС» хабар қилди.

78 сенатор номзодни қўллаб-қувватлади, 22 қонун чиқарувчи қарши чиқди. Яқин келажакда 58 ёшли Блинкен қасамёд қабул қилади.

Блинкен 1962 йил 16 апрелда Нью-Йоркда яҳудий оиласида туғилган. Унинг ота томондан аждодлари Россиядан АҚШга кўчиб келган.

Қўшма штатларнинг 42-президенти Билл Клинтон маъмурияти даврида Блинкен Оқ уйда Миллий хавфсизлик кенгаши ходими сифатида ишлаган. У президентнинг ташқи сиёсат бўйича махсус ёрдамчиси, Европа ишлари бўйича катта директори ҳамда стратегик режалаштириш бўйича ёрдамчиси бўлган. 2002–2008 йилларда бўлажак давлат котиби Сенатнинг ташқи ишлар қўмитасининг Демократик фракцияси аппаратини бошқарган. Ушбу даврда қўмита раиси амалдаги давлат раҳбари бўлган, унинг таркибига кейинчалик АҚШнинг 44-президенти бўлган Барак Обама ҳам киритилган.

Обама 2009 йилда Америка етакчисига айланганда ва Байден вице-президент лавозимини эгаллаганида, Блинкен биринчи бўлиб миллий хавфсизлик бўйича вице-президент ёрдамчиси лавозимига кўтарилган.

2013 йилда у давлат раҳбарининг миллий хавфсизлик бўйича ёрдамчисининг ўринбосари бўлди. Шунда Байден уни қуйидагича таърифлаганди: «Блинкен ҳар қандай ишни ҳам уддалай олади. Тони Блинкен – супер юлдуз ва бу муболаға эмас. Президент буни тўрт йил мен билан бирга ишлаганидан кейин тан олди ва уни мендан тортиб олди».

Блинкен 2015–2017 йилларда ўша вақтдаги давлат котиби Жон Керрининг ўринбосари бўлган. 2020 йилги президентлик кампанияси пайтида Блинкен Байденнинг сайловолди штабининг бир қисми – халқаро масалалар бўйича маслаҳатчиси бўлган.

Эслатиб ўтамиз, 2018 йилда Рекс Тиллерсон АҚШ давлат котиби лавозимидан бўшатилган ва Трампнинг тавсиясига кўра, МРБ директори Майк Помпео ушбу лавозимни эгаллаган.

Аввалроқ АҚШ молия вазири лавозими биринчи марта аёл кишига топширилгани, Пентагон раҳбари этиб Ллойд Остин тасдиқлангани ва у ушбу лавозимни эгаллаган биринчи афроамерикалик бўлгани ҳамда АҚШ Миллий разведкаси директори лавозимини биринчи марта аёл киши эгаллагани ҳақида хабар берилганди.