AQShning saylangan prezidenti Jo Bayden Davlat departamenti rahbarlik lavozimiga o‘zining maslahatchisi Entoni Blinkenni tayinlash niyatida. Bu haqda Bloomberg o‘zining uchta manbasiga tayanib xabar berdi. Shuningdek, The New York Times, Reuters va CNN ham bu haqida yozgan.
58 yoshli Entoni Blinken — Baydenning eski hamfikrlaridan biri bo‘lib, u bilan salkam 20 yildan buyon hamkorlik qilib keladi. Bunga qadar Blinken Bill Klintonning spichrayterlaridan biri bo‘lgan va Barak Obama davrida davlat kotibi o‘rinbosari lavozimida ishlagan. Obama davrida Blinken AQSh tashqi siyosatining shakllanishida muhim rol o‘ynagan, xususan, 2014-yilda Qrimning Rossiyaga qo‘shilishiga javob tanlanishida ham.
Shuningdek, Bayden prezidentning milliy xavfsizlik masalalari bo‘yicha yordamchisi lavozimiga o‘z nomzodini aniqlab olgan. Ushbu lavozimga bunga qadar Hillari Klintonning maslahatchisi bo‘lgan Jeyk Sallivan ilgari suriladi.
Bayden AQShning BMTdagi doimiy vakili lavozimiga Linda Tomos-Grinfild nomzodini ilgari suradi. U Afrika masalalari bo‘yicha mutaxassis hisoblanadi va Obama davrida davlat kotibi yordamchisi bo‘yicha ishlagan.
Uchala nomzodning ham rasmiy e’lon qilinishi 24-noyabr sanasiga mo‘ljallangan.
Ma’lumot uchun, 2018-yilda Reks Tillerson AQSh davlat kotibi lavozimidan bo‘shatilgan va Trampning tavsiyasiga ko‘ra, MRB direktori Mayk Pompeo ushbu lavozimni egallagan. Mavzuga doir:- Financial Times AQSh kuch tuzilmalari Trampning so‘nggi ko‘rsatmalariga qarshilik ko‘rsatishi mumkinligini ma’lum qildi
- AQSh Sog‘liqni saqlash vazirligi saylovlarning rasmiy natijasi e’lon qilinmagunicha, Bayden bilan ishlashdan bosh tortdi
Pensilvaniya sudi Trampning Filadelfiyadagi saylovlarida qonun buzilishlari qayd etilgani bo‘yicha da’vosini rad etdi. Keyinroq Bayden hokimiyatni topshirishdan bosh tortayotgan Tramp ma’muriyatini sudga berishi mumkinligini bildirdi.
