Ўзбекистонда 28 январдан кафе ва ресторанларнинг соат 08:00 дан 23:00 гача бўлган даврида фаолият юритиши билан боғлиқ бўлган чекловлар бекор қилинди. Бу ҳақда 26 январь, сешанба куни эълон қилинган Республика махсус комиссияси қарорида қайд этилди.
Унга кўра, умумий овқатланиш корхоналари ва кўнгилочар объектлар Вазирлар Маҳкамасининг «Тунги вақтда фаолият юритувчи умумий овқатланиш корхоналари ва кўнгилочар объектларда жамоат хавфсизлигини таъминлашга доир қўшимча чора-тадбирлар тўғрисида» 2019 йил 24 июлдаги қарори талаблари доирасида ўз фаолиятини давом эттириши мумкин.
«Шу ўринда таъкидлаб ўтиш жоизки, бугунги кунда дунёнинг қатор мамлакатларида коронавирус билан боғлиқ вазиятнинг кескинлашуви натижасида ҳаттоки ижтимоий ва иқтисодий соҳалар фаолиятини тўхтатиш каби чекловлар ҳамон давом этмоқда.
Республика махсус комиссияси халқимиздан коронавирус инфекцияси тарқалишининг олдини олиш мақсадида санитария-эпидемиологик қоидаларга қатъий риоя этишлари ҳамда мамлакатимизда эпидемиологик барқарорликни таъминлаш борасида эришилган бугунги вазиятнинг бардавом бўлиши учун шахсий масъулиятни оширишларини сўраб қолади», — дейилади баёнотда.
Эслатиб ўтамиз, 2020 йил 31 декабрь ва 2021 йил 1 январь кунлари тўйхона, меҳмонхона, ресторан ҳамда кафеларда 30 кишидан кўп бўлган кўнгилочар тадбирларни коронавирусга ПЦР-тест ёки экспресс-тест текшируви асосида ташкил этилишига истисно тариқасида рухсат берилганди.
Изоҳ (0)