Bring & Trailer auksion uyi “Forsaj” yulduzi Pol Uokerga tegishli bo‘lgan o‘rta motorli BMW M1 superkari sotuvga qo‘yilishini e’lon qildi. Ikki eshikli model ajoyib holatda saqlangan bo‘lib, u hozirga qadar 6,8 ming kilometr yo‘l bosgan. Savdolar yakunlanishiga sakkiz kun qoldi, deb xabar beradi Motor.
O‘rta motorli BMW M1 — noyob va kamyob avtomobil hisoblanadi, chunki undan 1978-yildan 1981-yilga qadar 453 nusxa ishlab chiqarilgan. Auksionga qo‘yilgan kupe bu borada ham ajralib turadi, chunki 1980-yillar boshida M1’ni Germaniyaning AHG dileri modernizatsiya qilgan.
Ikki eshikli model poyga “obves”i, BMW Motorsport belgisi, turli kengliklardagi uch komponentli BBS diskalari, maxsus gaz chiqarish tizimi va 280 dan 354 ot kuchigacha bo‘lgan 3,5 litrli, olti silindrga ega BMW M88/1 motori bilan ajralib turadi.
Superkar interyeri dastlabki holatdagidek saqlanib qolgan: o‘rindiqlar charm bilan qoplangan, oynalari elektron ko‘tariladi, konditsioner va magnitola ham bor. Aktyor Pol Uoker BMW M1’ga 2010-yillar boshida egalik qilgan, mashinaning hozirgi egasi esa uni 2014-yilda sotib olgan.
Savdolari yakunlanishiga sakkiz kun qolgan BMW M1 uchun hozirda 390 ming dollar taklif qilinmoqda.
Avvalroq Avstraliyada “Forsaj” filmida suratga tushgan 50 yillik Chevrolet auksionga qo‘yilgani to‘g‘risida xabar berilgandi.
Izoh (0)