Qoraqalpog‘istonning Beruniy tumanida Nexia va Howo yuk mashinasi ishtirokida sodir bo‘lgan YTH oqibatida besh kishi halok bo‘ldi. Bu haqda “Yoshlar” telekanalining “Yangi davr” informatsion dasturida ma’lum qilindi.
Ma’lumotlarga ko‘ra, 21-yanvar, payshanba kuni soat 15:25 larda Beruniy tumani G‘uzor—Buxoro—Nukus—Beyneu avtomagistralining 651-kilometrida 1982-yilda tug‘ilgan fuqaro boshqaruvidagi Nexia-2 Beruniy tumani tomon harakatlanib kelayotgan Howo yuk mashinasi bilan to‘qnashib ketgan. Sodir bo‘lgan to‘qnashuv oqibatida yengil mashina haydovchisi va yo‘lovchilardan biri voqea joyida halok bo‘lgan.
Shuningdek, Nexia-2 salonida bo‘lgan boshqa yo‘lovchilar tuman tibbiyot birlashmasi jonlantirish bo‘limiga olib kelingan, biroq ko‘rsatilgan tez tibbiy yordam qaramay, ularning hayotini saqlab qolishning imkoni bo‘lmagan.
Ta’kidlanishicha, avariya qor yog‘gani sababli yo‘llarning sirpanchiq holga kelib qolgani oqibatida yuzaga kelgan.
“Katta tezlikda harakatlangan Nexia qarama-qarshi yo‘nalishda harakatlanib kelayotgan Howo yuk mashinasining qarshisiga chiqib ketgan”, — deyiladi xabarda.
Avvalroq Bektemirda Howo og‘ir yuk mashinasi Cobalt ustiga ag‘darilishi oqibatida bir kishi vafot etgani, shuningdek, Xorazmda Nexia va Howo to‘qnashuvi oqibatida bir kishi halok bo‘lgani to‘g‘risida xabar berilgandi.
Izoh (0)