Niderlandiyada koronavirus tufayli cheklovlarga qarshi norozilik namoyishlari bo‘lib o‘tdi (foto)

Niderlandiya politsiyasi Amsterdam va Eyndxoven shaharlarida namoyishchilarni tarqatish uchun maxsus vositalardan foydalandi. Mahalliy aholi koronavirusga qarshi kurash uchun hukumat tomonidan joriy qilingan chora-tadbirlarga qarshi chiqmoqda, deb yozadi “RBK”.

Politsiya suv zambaraklari, dubinkalarni qo‘lladi, Eyndxovenda esa ko‘zni yoshlantiruvchi gazdan ham foydalanishdi. Ikkala shahardagi namoyishchilar o‘z navbatida, huquq-tartibot organlari xodimlariga feyerverklar yog‘dirdi, Eyndxovenda esa odamlar kuch vakillari yo‘lini velosipedlardan iborat barrikadalar bilan to‘sishga urindi.

Norozilik aksiyalari uchun hukumatdan ruxsat olinmagan.

NOS nashri qayd etishicha, namoyishchilarning quvilishi oqibatida Eyndxovenda ommaviy tartibsizliklar yuzaga keldi. Odamlar mashinalarni yoqib, do‘konlarni o‘mara boshladi, mahalliy vokzal yaqinida yo‘l harakati to‘xtatib qo‘yildi.

Amsterdamda, politsiya ma’lumotlariga ko‘ra, 1,5 ming kishi mitingga chiqdi, ularning 100 dan ortig‘i hibsga olindi.

Amsterdamda o‘tgan hafta ham COVID-19 tufayli cheklovlarga qarshi namoyishlar bo‘lib, ular nazoratdan chiqib ketgan edi.

23-yanvardan Niderlandiyada butun mamlakat bo‘ylab 21:00 dan 04:30 gacha amal qiladigan komendantlik soati kuchga kirdi, u 10-fevralgacha davom etadi.

Politsiya allaqachon 3,6 ming kishini komendantlik soatini buzgani uchun jarimaga tortdi. 25 kishi qo‘lga olindi.

So‘nggi ma’lumotlarga ko‘ra, Niderlandiyada kasallanganlar soni 962 104 kishiga yetgan.