Германиядаги кекса инсонлар ва ногиронлиги бўлган шахсларни парвариш қилиш билан шуғулланувчи компаниялардан бири коронавирусга қарши эмланишни истамаган етти нафар ходимини ишдан бўшатди, деб ёзади «Korrespondent.net».
Bild газетасининг ёзишича, Германияда вакцинация ихтиёрий равишда ўтказилмоқда ва мазкур ходимларнинг инфекцияга қарши эмланишдан бош тортгани сабаб ишдан бўшатилиши биринчи ҳолат ҳисобланади.
«Кексаларни парвариш қилиш билан шуғулланувчи компания Рене Вильмерга тегишли — ишдан бўшатиш тўғрисидаги қарорни айнан у қабул қилган. Бундан олдин фирма эгаси эмланиш бўйича қарор қабул қилиш учун ходимларга икки кун муҳлат берган. Бироқ улар рад этган», — дейилади хабарда.
Уч нафар ходим вакцина олишдан бош тортган, яна тўрт нафари эса белгиланган муддатда бир қарорга келишга улгурмаган. Натижада Вильмер уларнинг барчасини ишдан бўшатган.
«Беморларимизни ҳимоя қилиш учун қўлимдан келган барча ишни қиламан. Бу менинг ахлоқий бурчим», — дейди у.
Таъкидланишича, бу каби хатти-ҳаракатидан сўнг Вильмерга вакцинацияга қарши бўлганлар томонидан таҳдидлар кела бошлаган. Ҳатто эркакни ўлдириш билан қўрқитишган.
Германида коронавирусга қарши вакцинация декабрь охирида бошланган. Мамлакат 2020 йил охирида BioNTech ва Pfizer вакцинасидан 1,3 миллион доза олган. 2021 йил бошида яна 4 миллион доза етказиб берилиши режалаштирилган эди.
Мавзуга доир:
Изоҳ (0)