Toshkent viloyati Zangiota tumanidagi 16-sonli davlat maktabgacha ta’lim tashkiloti direktori salkam 1 milliard so‘mni talon-toroj qilgan. Bu haqda Maktabgacha ta’lim vazirligi matbuot xizmati xabar berdi.
Ma’lum bo‘lishicha, ushbu bog‘chada budjetdan ajratilgan mablag‘larning maqsadli ishlatilishi yuzasidan Maktabgacha ta’lim vazirligi Ichki audit, moliyaviy va huquqiy nazorat xizmati va Bosh prokuratura huzuridagi iqtisodiy jinoyatlarga qarshi kurashish departamenti Toshkent viloyati Zangiota tuman bo‘limi hamkorligida tekshiruv o‘tkazilgan.
Tekshiruv natijasida bog‘cha mudirasi 2014—2020-yillar davomida 37 nafar shaxsni, shu jumladan, 4 nafar qarindoshini turli lavozimga ishga olgani, aslida esa ular ishlamagani ma’lum bo‘ldi. Ammo ularning mehnat faoliyati bo‘yicha soxta ma’lumotlar kiritish orqali hujjatlarni qalbakilashtirib, 6 yil ichida ularga jami 983,5 million so‘m ish haqi hisoblab, plastik kartalar orqali o‘zlashtirgan.
Bosh prokuratura matbuot xizmatining ma’lum qilishicha, holat yuzasidan MTT mudirasi va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)