Тошкент вилояти Зангиота туманидаги 16-сонли давлат мактабгача таълим ташкилоти директори салкам 1 миллиард сўмни талон-торож қилган. Бу ҳақда Мактабгача таълим вазирлиги матбуот хизмати хабар берди.
Маълум бўлишича, ушбу боғчада бюджетдан ажратилган маблағларнинг мақсадли ишлатилиши юзасидан Мактабгача таълим вазирлиги Ички аудит, молиявий ва ҳуқуқий назорат хизмати ва Бош прокуратура ҳузуридаги иқтисодий жиноятларга қарши курашиш департаменти Тошкент вилояти Зангиота туман бўлими ҳамкорлигида текширув ўтказилган.
Текширув натижасида боғча мудираси 2014—2020 йиллар давомида 37 нафар шахсни, шу жумладан, 4 нафар қариндошини турли лавозимга ишга олгани, аслида эса улар ишламагани маълум бўлди. Аммо уларнинг меҳнат фаолияти бўйича сохта маълумотлар киритиш орқали ҳужжатларни қалбакилаштириб, 6 йил ичида уларга жами 983,5 миллион сўм иш ҳақи ҳисоблаб, пластик карталар орқали ўзлаштирган.
Бош прокуратура матбуот хизматининг маълум қилишича, ҳолат юзасидан МТТ мудираси ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)