Urganch tumanidagi Bekobod qishlog‘ida yashovchi P.K. nikohsiz yashayotgan turmush o‘rtog‘i bilan jinoiy til biriktirib, hali tug‘ilmagan 4 oylik farzandini sotmoqchi bo‘ldi. Bu haqda “Postda.uz” nashri xabar berdi.
Qayd etilishicha, hazorasplik T.B. homilaga xaridor bo‘lgan. Ikki tomon kelishuvi asosida 4 oylik homila tug‘ilgandan so‘ng olish sharti bilan 9000 dollarga baholangan.
P.K. turmush o‘rtog‘i bilan kelishilgan pulning 6000 dollarini olayotgan paytida ashyoviy-dalillar bilan qo‘lga olingan
Holat yuzasidan jinoyat ishi qo‘zg‘atilgan.
Ma’lumot uchun, O‘zbekistonda oxirgi ikki yil ichida chaqaloq savdosi bo‘yicha 49 nafar ota-ona va 38 nafar vositachi ayblanib, jinoiy javobgarlikka tortilgan. Ammo aybdorlarga nisbatan jazo choralarini qo‘llashda yengilliklar berib yuborilmoqda. Xususan, 2019—2020-yillarda farzandini sotgan ota-onalarning 38,8 foiziga, vositachilarning esa bor-yo‘g‘i 5,2 foiziga qamoq chorasi qo‘llanilgan, xolos. Qolganlariga esa sinov muddati, axloq tuzatish ishlariga jalb etish kabi choralar qo‘llanilgan. 2020-yilning dekabr oyida Oliy Majlis Senati raisi Tanzila Norboyeva chaqaloq savdosi ishtirokchilariga nisbatan jinoiy jazoni kuchaytirish lozimligini ta’kidlab, IIV va Oliy sud vakillariga topshiriq bergan.
2017—2020-yillardagi holatlar tahliliga ko‘ra, o‘z chaqalog‘ini sotgan ayollarning 31 foizi og‘ir ijtimoiy ahvolda ekanligi sababli, 17 foizi homilani yashirish, 52 foizi esa moddiy manfaat topish maqsadida ushbu jinoyatlarni sodir etgan.
Izoh (0)