Sirdaryoda “Jihodchilar” diniy-ekstremistik oqimining yashirin guruhi a’zolari qo‘lga olindi

21-yanvar kuni Sirdaryo viloyati bo‘yicha DXX boshqarmasi hamda viloyat IIB xodimlari hamkorligida o‘tkazilgan tezkor tadbirda “Jihodchilar” ekstremistik oqimining yashirin guruhi a’zolari qo‘lga olindi. Bu haqda viloyat IIB axborot xizmati xabar berdi.

Ma’lumotlarga ko‘ra, mazkur guruhning 2 nafar yetakchisi Rossiyada mavsumiy ishlashi davomida radikal guruhlar ta’siriga tushib, yashash joyiga qaytib kelganidan so‘ng aholi orasida o‘zlarining buzg‘unchi g‘oyalarini targ‘ib qilish va ijtimoiy tarmoqlar orqali xalqaro terrorchilik tashkilotlarining g‘oyaviy rahnomalarining ma’ruzalarini tarqatish bilan shug‘ullangan. Jumladan, O‘zbekiston Oliy sudining qarori asosida taqiqlangan ekstremistik va terrorchilik guruhlariga aloqador shaxslarning maqola va ma’ruzalarini internet tarmog‘idan yuklab olib, ularni saqlash va atrofdagilarga tarqatish, shuningdek, Suriyada davom etayotgan qurolli to‘qnashuvlarda ishtirok etuvchi terrorchilik guruhlarini moliyalashtirgan.

Ushbu jinoiy guruh rahbarlari 2020-yilda Sardoba suv ombori bilan bog‘liq suv toshqini oqibatida talafot ko‘rgan masjidlarning qayta qurilishiga moddiy ko‘mak yig‘ishni aytib, Telegram’da xayriya guruhini ochib, bank plastik kartasiga ehson qilingan mablag‘larni Suriyaga jo‘natish bilan shug‘ullangan.

Ta’kidlanishicha, qo‘lga olinganlardan ba’zilari karantin cheklovlari bekor qilingach, Suriyaga chiqib ketishni rejalashtirish maqsadida ushbu mamlakat hududidagi maslakdoshlari bilan aloqada bo‘lib kelgan.

Tezkor tadbirlar natijasida ekstremistlarning barcha a’zolari qo‘lga olinib, yashash manzillarida o‘tkazilgan tintuv-tergov harakatlari davomida ularning jinoiy faoliyatini fosh etuvchi daliliy ashyolar olingan.

Hozirda Jinoyat kodeksining tegishli moddalari bilan qo‘zg‘atilgan jinoyat ishi doirasida tergov-surishtiruv ishlar davom ettirilmoqda.

Avvalroq Toshkent shahri va Toshkent viloyatida, Andijon shahrida “Jihodchilar” guruhi a’zolari qo‘lga olingani, Farg‘onada esa “Hizb ut-Tahrir” terrorchilik tashkiloti faoliyatiga chek qo‘yilgani to‘g‘risida xabar berilgandi.